बाबियाचौर, । म्याग्दीको मङ्गला गाउँपालिकाको बाबियाचौर–काफलचौर–सल्यान–भर्जुला सडकमार्ग स्तरोन्नति भएको छ ।
यो सडक मङ्गला गाउँपालिकाको केन्द्र बाबियाचौरसँग वडा नं १ र २ का बस्ती जोडिन्छ । विसं २०६७ मा स्थानीयवासीले चन्दा सङ्कलन गरेर मार्ग खुलेको सडक स्तरोन्नतिको कामले पछिल्लो तीन आर्थिक वर्षदेखि निरन्तरता पाएको हो ।
बेनी–दरवाङ सडक मा पर्ने भाइवाङ खोलादेखि शुरु हुने सडकको प्रवेश बिन्दु देखि काफलचौर हुदै सल्यान खण्डको सडक स्तरोन्नति भएको मङ्गला गाउँपालिका–२ का वडा अध्यक्ष धनबहादुर खाती क्षेत्रीले बताउनुभयो ।
“यो मङ्गला गाउँपालिकाको केन्द्रबाट बस्ती जोड्ने गण्डकी प्रदेश सरकारसँगको लागत साझेदारीमा सञ्चालित प्राथमिकताप्राप्त आयोजना हो,” उहाँले भन्नुभयो “पछिल्लो तीन वर्षमा रु. दुई करोड १५ लाखको लागतमा सडक फराकिलो पारेर नाली, टेवा र ग्यावीयन पर्खाल निर्माण गरेर पाँच सय ३८ मिटर दुरीमा ढलान गरिएको गाउँपालिकाले जनाएको छ ।”
चालु आर्थिक वर्ष २०८१÷०८२ मा रु. ९४ लाखमा ठेक्का लिएको मङ्गला कन्ट्रक्सन प्रा.ली.ले भाइवाङखोलाको प्रवेशबिन्दु देखि एक सय १० मिटर सडक छ मिटर फराकिलो बनाएर ढलान गरेको गाउँपालिकाका असिस्टेन्ट सव ईञ्जिनियर विपिन आचार्यले बताउनुभयो ।
ढलानका साथै सडकमा पहिरो, बाढी र कटान रोकथामका लागि ग्यावीयन, मेसिनरी र पलम पर्खाल निर्माण गरिएको छ । आगामी असारसम्मको ठेक्का अवधि भए पनि लक्ष्यभन्दा तीन महिना अगाडि नै सम्पन्न हुने चरणमा पुगेको हो ।
आर्थिक वर्ष २०८०÷०८१ मा दुई वटा शिर्षकमा रु. ८० लाखको लागतमा काफलचौर–सल्यान खण्डमा दुई सय ५० मिटर ढलान भएको थियो । २०७९÷०८० मा उपभोक्ता समिति मार्फत भाइवाङखोला–काफलचौर खण्डमा रु. ५० लाख बजेटबाट एक सय ७८ मिटर ढलान सहित स्तरोन्नति भएको थियो ।
भरजुला–थाइवाङ खण्डमा गण्डकी प्रदेश सरकारअन्तर्गतको पूर्वाधार विकास कार्यालयमार्फत रु आर्थिक वर्ष २०८०÷०८१ मा रु. ३० लाख बजेटबाट ढलानसहितको स्तरोन्नति भएको थियो । सडक स्तरोन्नति भएपछि यात्रा अवधि छोटिएको, सुरक्षित र सहजरूपमा आवतजावत गर्न पाएको सल्यानका बासिन्दा राजकुमार अधिकारीले बताउनुभयो ।
“चन्दा र तत्कालीन गाविस–जिविसको बजेट परिचालन गरेर मार्गमात्र खोलिएको सडक साँघुरो, ग्रेड र घुम्ती नमिलेका कारण दुर्घटनाको जोखिम थियो,” उहाँले भन्नुभयो “भाइवाङखोला देखि भरजुला पुग्न यसअघि २० मिनेट लाग्ने गरेकोमा अहिले यात्रा अवधी पाँच मिनेटमा छोटिएको छ ।”
भाइवाङखोला–काफलचौर–सल्यान–भरजुला खण्डको अप्ठ्यारो सडक विस्तार, ग्रेड र घुम्ती सुधार गरी नाली, पर्खाल निर्माण भएको छ । यस सडक काफलचौर, सल्यान, भरजुला, थाइवाङ, भाइवाङ र हिदीका करिब एक हजार घरधुरीले प्रयोग गर्छन् । सडक स्तरोन्नतिको कामलाई प्रदेश र संघीय सरकारसँगको साझेदारीमा निरन्तरता दिइने मङ्गला गाउँपालिकाका उपाध्यक्ष पेमा अधिकारीले बताउनुभयो ।
