बेनी, दुर्घटनामा परि ज्यान गुमाएका मजदुरका आफन्त र गाउँलेहरुले नेपाल विद्युत प्राधिकरणको सहायक कम्पनी रघुगङ्गा हाइड्रोपावरद्धारा म्याग्दीको रघुगङ्गा गाउँपालिकामा निर्माणाधिन राहुघाट जलविद्युत आयोजनाको कार्यालयमा सोमबार तालाबन्दी गरेका छन् ।
रघुगङ्गा गाउँपालिका–४ बुक्ल स्थित राहुघाट जलविद्युत आयोजनाको अडिट नं. २ मा फागुन २९ गते ठेकेदार कम्पनी जयप्रकाश एसोसियट्स (जेपी) को डिपी टु ए ७०८३ नम्बरको मिस्कर सडकबाट ८० मिटर तल खसेर दुर्घटना हुँदा चालक बेनी नगरपालिका–२ खबराका ४२ वर्षीय हेमबहादुर घिमिरेको घटनास्थलमै मृत्यु भएको थियो ।
निर्माण कम्पनी र आयोजनाले मृतकका परिवारलाई राहत तथा क्षतिपुर्ति उपलब्ध गराउन बेवास्ता गरेकाले पिप्ले स्थित रघुगङ्गा हाइड्रोपावरको कार्यालयमा ताला लगाएको बेनी नगरपालिका–२ का निवर्तमान वडा अध्यक्ष हिराबहादुर थापाले बताउनुभयो ।
ठेकेदारको तिल्केनीचौर स्थित कार्यालयमा ताला लगाउन पुगेको बेनी नगरपालिका–२ ज्यामरुककोटका बासिन्दालाई प्रहरीले रोकेको थियो । ताला लगाएपछि सम्बद्ध पक्षले मंगलबार बिहान छलफलका लागि बोलाएको पुर्व वडा अध्यक्ष थापाले बताउनुभयो ।
बेनी अस्पतालमा राखिएको मृतकको शव आफन्तले बुझ्न मानेका छैनन् । ठेकेदार कम्पनीले बिमा र कम्पनीको नियम अनुसार पाउने राहत उपलब्ध गराउन तयार भएपनि मृतकका आफन्तले रु. ५० लाख माग गरेकाले सम्बोधन गर्न समस्या भएको प्रतिक्रिया दिएको छ ।
निर्माणको अन्तिम चरणमा पुगेको ४० मेगावाट क्षमताको राहुघाट जलविद्युत आयोजनामा गत पुष महिनायता भएका दुर्घटनामा घिमिरे सहित चार जनाको मृत्यु भएको छ । रघुगङ्गा हाइड्रोपावरका प्रबन्ध सञ्चालक गणेश केसीले समन्वय र सहजिकरण गरेपनि ठेकेदार र मजदुरका आफन्तहरुसँग सम्बन्धीत विषय भएको प्रतिक्रिया दिनुभयो ।
