बेनी, ः म्याग्दीको बेनी नगरपालिका–४ सिंगा तातोपानीमा आमाहरुको फुटबल प्रतियोगिता भएको छ ।
खेलकुद मार्फत महिला शसक्तिकरण गर्ने उद्देश्यले फागु पुर्णिमा पर्वको अवसरमा जलमाई भगवति आमा समूहले आयोजना गरेको प्रतियोगितामा तातोपानी, पखेर र सिंगाका पाँच वटा आमा समूह सहभागि भएका थिए ।
फाइनलमा आयोजक जलमाई भगवति आमा समूह (ए)ले मङ्गला गाउँपालिका–३ को पखेर आमा समूहलाई एकका विरुद्ध चार गोल गर्दै बिजयी भएको छ । बिजेताले रु. १५ हजार र उपबिजेताले रु. आठ हजारको साथमा ट्रफी, मेडल र प्रमाणपत्र प्राप्त गरेका छन् । जलमाई भगवति आमा समूहका दुई, सरस्वति माविको महिला शिक्षक, पखेर र सिंगाको जनजागृति आमा समूहले प्रतिस्पर्धा गरेका थिए ।
जलमाई भगवति आमा समूहका सचिव मिना जुग्जालीले खेलमैदान सानो भएकाले एक वटा समूहमा पाँच जनाका दरले खेलाडी सहभागी गराइएको बताउनुभयो । “आमाहरुको मात्र फुटबल प्रतियोगिता जिल्लामै पहिलो पटक तातोपानीमा भएको हो,” उहाँले भन्नुभयो “खेलकुद मार्फत आमाहरुलाई जागरुक र सामाजिक क्षेत्रमा क्रियाशिल बनाउन प्रतियोगिता आयोजना गरिएको हो ।”
आमाहरु लुङ्गी, चोलो, कुर्ता सुरुवालको पहिरनमा खेलमैदानमा उत्रिएका थिए । प्राकृतिक चिकित्सालयको रुपमा परिचित तातोपानीमा परम्परागत रुपमा लाग्ने फागु पुर्णिमा मेलालाई यसपाली पहिलो पटक आमा समूहले निरन्तरता दिएका हुन् । यसअघि युवा क्लवले मेला आयोजना गर्दै आएका थिए ।
मेलामा फाइभ ए साइड पुरुष फुटसल, महिला र पुरुष लठो तान्ने, अन्धनिशान, पुरुष छेलो, महिला छेलो, भाले छुने प्रतियोगिता आयोजना गरिएको थियो । ११ समूह सहभागी पुरुष फुटबल प्रतियोगितामा बागलुङ बिजेता र सुर्केमेला उपबिजेता भएका छन् ।
बिजेताले रु. १७ हजार र उपबिजेताले रु. आठ हजार नगदको साथमा ट्रफी, मेडल र प्रमाणपत्र प्राप्त गरेका छन् । मेला तीन दिन सम्म सञ्चालन भएको थियो
