बेनी, । बेनीमा बिहिबार एचआइभी एड्स सम्बन्धी भेदभाव, लान्छना र हिंसा विरुद्धको अभिमुखीकरण कार्यक्रम सम्पन्न भएको छ ।
स्वास्थ्य कार्यालय म्याग्दीको समन्वयमा स्वास्थ्य निर्देशनालय गण्डकी प्रदेश पोखराले कार्यक्रमको आयोजना गरेको कार्यक्रममा एचआइभी संक्रमितको अवस्था, समस्या र भेदभाव, लान्छना र हिंसा न्युनीकरणमा सरोकारवालाहरुको भूमिकाका विषयमा छलफल भएको थियो ।
निर्देशनालयका जनस्वास्थ्य अधिकृत कमल रानाभाटले एचआइभी संक्रमितलाई समाजमा अझै पनि दोषरोपण, एक्लाउने तथा वहिष्कार र भेदभाव गरिदा उनिहरुको व्यक्तिगत र मानवीय अधिकार हनन् हुने भएकाले यसप्रति सचेत बन्नुपर्ने बताउनुभयो ।
“एचआइभी कसरी सर्छ भन्ने विषयमा समुदाय स्तरमा तथ्य र वास्तविक जानकारी नहुँदा संक्रमितहरुलाई गलत ब्यवहार भइरहेको छ,” उहाँले भन्नुभयो “जनप्रतिनिधी, सुरक्षा निकाय, सामाजिक संघ संस्था, स्वास्थ्यकर्मी र सञ्चारकर्मी मार्फत एचआइभी संक्रमितलाई मानवीय ब्यवहार गर्नुपर्ने सन्देश प्रवाह गराउन आवश्यक छ ।”
अर्का जनस्वास्थ्य निरिक्षक सुजता पोख्रेलले गण्डकीमा हाल दुई हजार आठ सय ३९ जना एचआइभी संक्रमितले एआरभी औषधी सेवन गरिरहेका जानकारी गराउदै औषधीको प्रयोग, संक्रमितको आत्मविश्वास र समुदायले साथ दिएमा एचआइभी संक्रमितहरु पनि सामान्य नागरिक सरह जिवन बिताउन सक्ने बताउनुभयो । म्याग्दीमा वि.स. २०८० मा ९२ जनाले एआरटी औषधी सेवन गरिरहेकामा हाल ८८ जना रहेका पोख्रेलले बताउनुभयो ।
बेनी नगरपालिकाका प्रमुख सुरत केसीले एचआइभी संक्रमितलाई पनि अन्य सामान्य नागरिकलाई व्यवहार हुने वातावरण बनाउन सचेतनामा जोड दिनुभयो । एचआईभी संक्रमित भन्ने वित्तिकै गलत किसिमले सोच्ने र व्यवहार गर्ने चलनको अन्त्य गर्ने प्रतिवद्धता जनाउनुभयो ।
स्वास्थ्य कार्यालय म्याग्दीका प्रमुख भुवन ठकुराठीले एचआइभी संक्रमितबाट जन्मिने बच्चाहरुमा एचआइभी नसर्ने औषधीको विकास भइसकेको र नियमित औषधीको प्रयोगबाट संक्रमितले लामो जिवन पाउन थालेको बताउनुभयो ।
भेदभाव, लान्छना र हिंसा गर्नेलाई कारबाही गर्ने कानुन समेत बनेको उहाँले बताउनुभयो । कार्यक्रमको सञ्चालन स्वास्थ्य कार्यालय म्याग्दीका सूचना अधिकृत गणेश सुवेदीले गर्नुभएको थियो ।
