बेनी, ११ मङसिर ः म्याग्दीको धवलागिरी गाउँपालिका–७ शिवाङमा रहेको हेम नमुना आवासीय माविका शिक्षकहरुलाई मङगलवार सम्मान गरिएको छ ।
टिकामाया स्मृति कोषले २६ जना शिक्षकहरुलाई नगद रु. दुई÷दुई हजारका दरले सम्मान गरेको हो । यसैगरी शिक्षक मणिराम थनेतलाई अतिरिक्त समयमा सेवा गरेवापत थप नगद रु. २५ हजार सहित पुरस्कृत गरिएको प्रअ सेरबहादुर केसीले बताउनुभयो ।
प्रतिनिधिसभा सदस्य खमबहादुर गर्बुजा (खम्बिर), धवलागिरी गाँउपालिकाका अध्यक्ष प्रेमप्रसाद पुन, उपाध्यक्ष रेशम पुनमगर,वडा अध्यक्ष अशोक खत्री, विद्यालय व्यवस्थापन समितिका अध्यक्ष नरकुमारी बुढाथोकीले पुरस्कृत गर्नुभएको थियो ।
शिक्षकलाई सिर्जनशिल बनाउन कोषले दुई वर्यायता शिक्षकहरुलाई सम्मान गर्दैै आएको छ । गत वर्ष चार जना शिक्षकहरुलाई पुुरस्कृत गरिएकोमा यसपाली सबै शिक्षकहरुलाई पुुरस्कृत र सम्मान गरिएको प्रअ केसीले बताउनुभयो ।
कोषबाट तह र विभिन्न विधामा उत्कृष्ट विद्यार्थीहरुलाई पनि पुरस्कृत गरिएको छ । अमेरिकामा होटल व्यवसाय गर्नुहुने गुरुङले दिवंगत आमा टिकामायाको स्मृतिमा वि.स. २०७९ मा कोष स्थापना गर्नुभएको थियो ।
कक्षा १२ सम्मको पठनपाठन हुने विद्यालयमा घर टाढा र पारिवारिक समस्या भएका विद्यार्थीहरुलाई निशूल्क छात्रावासको सुविधा दिएको छ । कार्यक्रममा गायिका शान्तिरानी परियारले गित, अन्य कलाकार र विद्यार्थीहरुले नृत्य प्रस्तुत गरेका थिए ।
