बेनी, म्याग्दीमा एक जना युवतिलाई एक हजार एम्पुल भन्दा बढी परिणाममा लागू औषध सहित प्रहरीले पक्राउ गरेको छ ।
म्याग्दीको मङ्गला गाउँपालिका–२ बाबियाचौरकी २३ वर्षीया पूर्णा बिकलाई एक हजार एक सय ९३ एम्पुल लागू औषध सहित पक्राउ गरिएको जिल्ला प्रहरी कार्यालयले जनाएको छ । मङसिर २ गते आइतबार पक्राउ परेकी बिकलाई बिहिबार सार्वजनिक गरिएको हो ।
बिकको घर खानतलासी गर्ने क्रममा तीन सय ९८ एम्पुल डाइजापाम, तीन सय ९७ एम्पुल फेनेरागन र तीन सय ९८ बुप्रेनोफिन भेटिएको प्रहरी निरीक्षक सागर पौडेलले बताए ।
उनका अनुसार विशेष सूचनाको आधारमा बिकको घर खानतलासी गर्ने क्रममा चामलको बोरामा लुकाएर राखेको अवस्थामा लागु औषध भेटिएको हो ।
बिकका विरुद्ध म्याग्दी जिल्ला अदालतमा लागूऔषध शिर्षकमा मुद्दा दर्ता गरि अनुसन्धान भइरहेको प्रहरीले जनाएको छ । पूर्णको साथबाट म्याग्दी जिल्लामा हालसम्मकै ठूलो परिमाणमा लागू औषधी बरामद भएको प्रहरीले जनाएको छ ।
