बेनी । म्याग्दीको अन्नपूर्ण गाउँपालिकाको ग्रामिण क्षेत्रमा पर्ने वडा नम्बर ७ हिस्तान र वडा नं. ८ राम्चेका पसलहरुका अनुगमन गरिएको छ ।
गाउँपालिकाका अध्यक्ष भारतकुमार पुनको नेतृत्वमा जिल्ला प्रशासन कार्यालयका प्रतिनिधी सहितको टोलीले सोमबार र मङगलबार दुई वटा वडाका ३६ वटा पसलको अनुगमन गरेको हो । अनुगमनका क्रममा रु. ५१ हजार नौ सय ४० मूल्य बराबरका म्याद नाघेका सामान जफत र नष्ट गरिएको अध्यक्ष पुनले बताउनुभयो ।
“डिलरहरुले म्याद सकिने समय भएको सामान गाउँमा सस्तोमा पठाउने गरेको पाइयो,” उहाँले भन्नुभयो “एक दिन अघि बिल काटेर गाउँमा पठाएको सामान पनि भेटियो । म्याद सकिन १५–२० अघि बजारमा नबिकेका सामान गाउँमा पठाउने समस्या पाइयो ।”
खाने तेल, कुरकुरे, कोक, फेन्टा, स्प्राइट, जुस, बियर, चिउरा, मिठाई, माडा जस्ता विशेष गरेर बालबालिकाले र भोज भतेरमा बढी प्रयोग हुने सामग्रीहरुको म्याद नाघेको पाइएको अध्यक्ष पुनले बताउनुभयो ।
ब्यापारीहरुलाई म्याद हेरेर मात्र सामान खरिद र बिक्री गर्न आग्रह गर्दै सामान पठाउने डिलरहरुलाई पनि उद्योग वाणिज्य संघ मार्फत सचेत बनाउने उहाँले बताउनुभयो । अन्नपूर्ण गाउँपालिकाले गत वर्षदेखि ग्रामिण क्षेत्रको बजार अनुगमनलाई निरन्तरता दिदै आएको छ ।
अनुगमनका क्रममा दर्ता नभएका पसललाई दर्ता प्रक्रियामा आउन, समयमै नविकरण गर्न र सरसफाईमा ध्यान दिन सुझाव दिएको टोलीले जनाएको छ । अध्यक्ष पुन सहित प्रशासकीय अधिकृत भगवति खड्का कटुवाल, जिल्ला प्रशासन कार्यालयका नायव सुब्बा लीलाबहादुर चोखाल, वडाका जनप्रतिनिधी र कृषि शाखाका प्राविधिक सम्झना क्षेत्री सहभागी हुनुभएको थियो ।
