बेनी, संविधान दिवस–२०८१ को अवसरमा बुधबार म्याग्दीको सदरमुकाम बेनी बजारको सार्वजनिक स्थानमा सरसफाई गरिएको छ ।
जिल्ला समन्वय समितिको आयोजना र म्याग्दी उद्योग वाणिज्य संघको व्यवस्थापनमा बेनीको कालीपुल बसपार्क देखि म्याग्दी र कालीगण्डकीको दोभान हुदै दरवाङ बसपार्कसम्म सरसफाई गरिएको हो ।
जिल्ला समन्वय समितिका प्रमुख राजकुमार थापाले बसपार्क र कालीगण्डकी तथा म्याग्दी नदी किनार आसपासका ठाउँमा फालिएका फोहोर संकलन र व्यवस्थापन गरिएको जानकारी दिनुभयो ।
“डेङ्गुको जोखिम पनि रहेकाले सचेतनाका लागि फोहोर व्यवस्थापनसँगै झाडी पनि हटाइएको छ,” उहाँले भन्नुभयो “सरसफाईप्रति समुदायलाई सचेत बनाउन सांकेतिक रुपमा कार्यक्रम गरिएको हो ।”
नदी किनार र सडक छेउमा धेरै फोहोर भेटिएको ठाउँ नजिकका घर धनीलाई सम्बन्धीत वडा कार्यालय मार्फत ब्यवस्थापनका लागि ताकेता गर्न निर्देशन दिएको जिसस प्रमुख थापाले बताउनुभयो ।
जनप्रतिनिधी, कर्मचारी, सुरक्षाकर्मी, उद्योगी, ब्यवसायी, संघ संस्थाका प्रतिनिधीहरुको सहभागितामा सरसफाई गरिएको थियो । म्याग्दीमा बुधबार, बिहिबार र शुक्रबार तीन दिन विभिन्न कार्यक्रम गरेर संविधान दिवस मनाउने कार्यक्रम तय भएको छ ।
सार्वजनिक स्थान तथा सरकारी कार्यालय सरसफाई र साँझ कार्यालयहरुमा दिप प्रज्वलन गर्ने कार्यक्रम रहेको छ । बिहिबार बिहान बेनी बजारमा ¥यालीको आयोजना गरिएको छ । वि.स. २०७२ असोज ३ गते संविधानसभाबाट संविधान जारी भएको दिनको सम्झनामा हर्षोल्लासका साथ दिवस मनाउन लागिएको हो ।
