बेनी । नेपाल ईन्जिनिययर्स एशोसियसनको आसन्न निर्वाचनका लागि गण्डकी प्रदेशका बाम घटक राजनीतिक दलहरु सम्बद्ध संगठनहरुले संयुक्त प्यानल बनाएका छन् ।
भदौ २८ गते हुने निर्वाचनका लागि नेकपा एमाले सम्बद्ध (पिन), माओवादी केन्द्र निकट (नियोन), एकिकृत समाजवादी निकट (सिन)ले चुनावी तालमेल गरेका हुन् । तीन वटा संगठनको संयुक्त प्रगतिशील समूहका उमेद्वारहरुले टोलीले बिहिबार म्याग्दी, बागलुङ र पर्वतमा चुनाव प्रचार, मतदाता भेटघाट र सुझाव संकलन गरेका छन् ।
प्रगतिशिल समूहबाट प्रदेश सभापतिमा महेन्द्रबहादुर गोदार, केन्द्रिय सदस्यमा रामचन्द्र पोख्रेल (आरसी), उपसभापतिमा कृष्ण रिजाल, सचिवमा आनन्द भट्टराई, सह–सचिवमा अस्मिता खनाल र कोषाध्यक्षमा सोभित श्रेष्ठ उमेद्वार बन्नुभएको छ ।
प्रगतिशिल समूहको सदस्यका उमेद्वारहरुमा मनोजकुमार सिंह, पदमलाल अधिकारी, सुवास शर्मा, सञ्जय सुवेदी, कालिदास सापकोटा, प्रदिप अर्याल, विवेक भट्टराई, ईश्वर भण्डारी, सञ्जय लामिछाने र सुदर्शन ढकाल रहनु भएको छ ।
सभापतिका उमेद्वार गोदारले झोलामा सिमित बनेको इन्जिनियर एसोसियसन गण्डकी प्रदेश समितिलाई संस्थागत गर्ने, सक्रीय बनाएर ईञ्जिनियरहरुको पेशागत हकहितका लागि पैरवी गर्ने मुद्दा सहित चुनावी मैदानमा आएको बताउनुभयो ।
निजी क्षेत्रमा कार्यरत ईञ्जिनियरहरुको नियुक्ति, अनुभवपत्र तथा सेवा सुविधामा एकरुपता कायम गर्ने, इन्जिनियरिङ सेवा अन्तर्गत नियुक्ति, पदोन्नति र सेवा सुविधालाई समान पद र कार्यबोझ अनुसार एकरुपता कायम गर्न पहल गर्ने तथा सरकारी तहमा थप ग्रेड तथा अनिवार्य फिल्ड भत्ताको व्यवस्थाका लागि पहल तथा संघर्ष गर्ने प्रगतिशिल प्यानलको एजेण्डा रहेको छ ।
प्रदेश सरकारको ईन्जिनियरिङ सम्बन्धी कानुन र नीति निर्माणमा सक्रीय सहभागीता जनाउने र स्थानीय तह लगायत कार्यलयहरुमा करारमा कार्यरत ईन्जिनियरहरुको पेशागत हकहित, अधिकार र जागिरको ग्यारेन्टिका लागि आवश्यक पहल गर्ने प्रगतिशिल समुहको एजेण्डा रहेको छ ।
सचिव पदका उमेद्वार आनन्द भट्टराईले भोट माग्नका लागि मात्र नभएर ईञ्जिनियरहरुको सुख र दुखमा साथ साथै रहने संस्थाका लागि आफ्नो समूहलाई जिताउन अपिल गर्नुभयो ।
