बेनी, । पर्वतको जलजला गाउँपालिकाले किसानले फलाएको रु. दश लाख भन्दा बढी मूल्य बराबरको आलुको विउ खरिद गरेको छ ।
जलजला गाउँपालिका–६ शालिजाका तीन वटा कृषक समूहले उत्पादन गरेको ३५ हजार ४७० किलोग्राम विउ आलु खरिद गरेको हो । विउ आलु बिक्री गरेका कृषकहरुलाई रु. १० लाख ७५ हजार चार सय सत्तरी रुपैयाँ भुक्तानी गरेको गाउँपालिकाको कृषि शाखाका अधिकृत राजु गौतमले बताउनुभयो ।
प्रगतिशिल बिउ उत्पादक कृषक समूहले उत्पादन गरेको दुई हजार दुई सय ७० किलोग्राम मुल विउ प्रतिकेजी रु. ३५ का दरले रु. ७९ हजार चार सय ७० मा खरिद गरेको छ । नमुना र प्रगतिशिल विउ उत्पादक कृषक समूहले उत्पादन गरेको ३३ हजार दुई सय किलोग्राम पहिलो पुस्ताको विउ रु. नौ लाख छ हजारमा खरिद गरेको हो ।
विउ उत्पादन गर्ने सबै कृषकहरुलाई समूहहरुलाई नगद उपलब्ध गराएको हो । कृषकबाट खरिद गरेको बिउ पोखरामा रहेको चिस्यान गृहमा भण्डारण गरेर राखिएको छ । विउ, मल र उत्पादन सामग्री उपलब्ध गराउने गाउँपालिकाले कृषकले उत्पादन गरेको आलुको मुल विउ पनि खरिद गरिदिएको हो ।
गाउँपालिकाले कृषकहरुबाट बर्खा याममा खरिद गर्ने विउ चिस्यानगृहमा भण्डारण गर्ने र हिउँदमा कृषकहरुलाईनै बिक्री गर्ने गरेको छ । आलुको विउ बिक्री गरेर जलजला गाउँपालिकाले गत आर्थिक वर्ष २०८०÷०८१ मा रु. २९ लाख ७१ ह्जार छ सय ४९ आम्दानी गरेको छ । गाउँपालिकाको आन्तरिक आम्दानीको २२ प्रतिशत आलुको बिउ बेचेर भएको हो ।
जलजला गाउँपालिकाका अध्यक्ष राजुप्रसाद आचार्यले आलुको गुणस्तरीय विउ उत्पादन, उत्पादन क्षमता कम भएको पुरानो विउ विस्थापित र विउ आलुमा आत्मनिर्भर बनाउन २ वर्षयता पिविएम (पुर्व विउ आलु) कार्यक्रम सञ्चालन गरिएको जानकारी दिनुभयो ।
“जलजलाको धेरै भूगोलमा आलु खेती भएपनि बर्षौदेखि एउटै विउको प्रयोग हुँदा उत्पादन, गुणस्तर र रोगकिराको समस्या देखियो,” उहाँले भन्नुभयो “गुणस्तरीय विउ उत्पादन गरेर आलु उत्पादन र गुणस्तर सुधार गर्ने उद्देश्यले राष्ट्रिय कृषि अनुसन्धान परिषद् (नार्क)ले सिफारिस गरेको रोग प्रतिरोधात्मक क्षमताको पुर्व मुल विउ भित्र्याएर मुल विउ उत्पादन गरि कृषकलाई बिक्री वितरणको ब्यवस्था मिलाएका छौ ।”
