बेनी, । मिस नेपाल २०२४ को प्रतिस्पर्धामा सहभागि म्याग्दीकी ललिता शेरबुजालाई जिताउन गृहजिल्लाका विभिन्न संघ संस्थाहरुले अभियान चलाएका छन् ।
नेपाल मगर संघ जिल्ला समन्वय समिति म्याग्दीले विहिबार बेनी बजारमा घरदैलो गरेर मिस नेपालमा ललितालाई भोट दिएर विजेता बनाउन अभियान सञ्चालन गरेको छ । सामाजिक सञ्जालमा पनि शेरबुजालाई जिताउन सबैलाई आह्वान गरेको छ ।
नेपाल मगर संघ म्याग्दीका अध्यक्ष लोकबहादुर पुन मगर (लोकेश)ले म्याग्दीली चेली ललिता शेरबुजा मगरलाई नेपाल ‘मिस नेपाल पिस २०२४’को विजेता बनाउन सबैलाई आग्रह गर्नुभयो । रघुगंगा गाउँपालिका–१, बेगखोला घर भई हाल अष्ट्रेलियालाई कर्मथलो बनाउँदै आउनुभएको छ ।
यसैगरी वडा अध्यक्ष बिलबहादुर फगामीले पनि ललितालाई भोट दिएर सहयोग गर्न सबैलाई आह्वान गर्नुभएको छ । शेरबुजाले म्याग्दी स्थित मगर समुदाय लगायत विभिन्न जातजातिका मौलिक पुख्र्यौली कला,भाषा र संस्कृतिको संरक्षण र पर्यटन क्षेत्रको प्रवद्र्धनका लागि आफुले काम गर्ने उद्घोष गर्नुभएको छ ।
केही समय अघि मात्र जिल्लाको अन्नपूर्ण गाउँपालिका–४, स्थित अन्नपूर्ण प्रथम हिमालको आधार शिविरमा जाने पर्यटकलाई लक्षित गरी पुरुष र महिलाले प्रयोग गर्ने दुई कोठे शौचालय निर्माण गर्नुभएको छ । ललितालाई जिताउन म्याग्दी प्रवासी नेपाली संघ (मोना) ले समेत अभियान संचालन गरिरहेको छ ।
