बेनी, म्याग्दीमा आगामी साता बालबालिकाहरुलाई पोलियो रोग विरुद्धको (आईपीभी) खोप लगाउने अभियान सञ्चालन हुने भएको छ ।
वि.स. २०७३ वैशाख देखि २०७५ असोज महिनासम्म जन्मिएका बालबालिकाहरुलाई आईपीभी खोप लगाउन यही जेठ १३ देखि १९ गतेसम्म सञ्चालन हुने अभियानको तयारी पुरा भएको छ ।
स्वास्थ्य कार्यालय म्याग्दीका सूचना अधिकारी गणेश सुवेदीले लक्षित उमेर समूहका चार हजार ३६२ जना बालबालिकालाई आईपीभी खोप लगाइने जानकारी दिनुभयो ।
१११ विद्यालय र विद्यालय नभएका थप २८ ठाउँमा खोप केन्द्र कायम गरिएको छ । स्वास्थ्यकर्मी र महिला स्वास्थ्यकर्मी सहित ४१७ जना जनशक्ति अभियानमा परिचालन हुने स्वास्थ्य कार्यालयका खोप सुपरभाईजर बिरेन्द्र महतोले बताउनुभयो ।
“खोप लगाउन छुटेका बालबालिका जन्मिएको समयमा आई पी भी खोप अभाव रहेकाले अहिले अभियान सञ्चालन गरिएको हो,” उहाँले भन्नुभयो “बालबालिकालाई पोलियो रोग विरुद्ध प्रतिरोध क्षमता बढाउनु अभियानको उद्देश्य रहेको छ ।”
लक्षित बालबालिकालाई खोप लगाउन अभिभावकहरुलाई निमन्त्रण गरिएको र जिल्लाभर अनुगमनका लागि ५७ सदस्यीय समिति बनाइएको स्वास्थ्य कार्यालय म्याग्दीका प्रमुख भुवन ठकुराठीले बताउनुभयो ।
पोलियो भाइरस पी (१) पी (२) र पी (३) गरी तीन प्रकारका हुन्छन् । तिनै थरी भाइरसबाट पोलियो रोग हुनसक्ने भएकाले अनिवार्य खोप लगाउन अनुरोध गरिएको छ ।
अभियानको बारेमा स्वास्थ्य कार्यालयले शुक्रबार एक कार्यक्रम आयोजना गरि जिल्ला खोप समन्वय समितिका पदाधीकारी र पत्रकारहरुलाई जानकारी गराएको छ ।
कार्यक्रममा जिल्ला समन्वय समिति म्याग्दीका प्रमुख राजकुमार थापाले मजदुरी गर्ने र खोपको महत्व नबुझेकाहरु छुट्न सक्ने भएकाले लक्ष्यअनुसारका बालबालिकालाई खोपको पहुँचमा ल्याउन सबैले सहयोग गर्नुपर्ने बताउनुभयो । कार्यक्रममा बेनी नगरपालिकाका मेयर सुरत केसी, जिसस उपप्रमुख दिलकुमारी खत्री, बेनी अस्पतालकी निमित्त डा. अञ्जु थापा लगायतको उपस्थिती रहेको थियो ।
