बेनी ः म्याग्दीको बेनी नगरपालिका–३ भकिम्लीमा बुधबार भएको ट्याक्टर दुर्घटनामा ५ जना घाइते भएका छन् ।
भकिम्लीको हाडेखानी डाडामा दाउरा ढुवानी गर्ने क्रममा ग १ त ६९४२ नम्बरको ट्याक्टर दुर्घटना हुँदा घाइते भएका १ जनालाई पोखरा रिफर गरिएको छ ।
जिल्ला प्रहरी कार्यालयका प्रहरी नायव उपरीक्षक भरत श्रेष्ठका अनुसार बेनी नगरपालिका–६ का १४ वर्षीय विजय किसानलाई पोखरा रिफर गरिएको र अन्य ४ जनाको बेनी अस्पतालमा उपचार भइरहेको छ ।
घाइते हुनेहरुमा धवलागिरी गाँउपालिका–३ का ३६ वर्षीय लालबहादुर छन्त्याल, बेनी नगरपालिका–६ का ३४ वर्षीय कृष्ण किसान सेन्चुरी, बेनी नगरपालिका–३ का १६ वर्षीय रोहित पुन र १८ वर्षका पवन पुन रहेका छन् ।
उपचारमा संलग्न चिकित्सकले घाइतेहरु खतरामुक्त रहेका र स्वास्थ्यमा सुधार आएको बताएका प्रनाउ श्रेष्ठले जानकारी दिनुभयो । घाइतेहरुलाई स्थानीयबासीले उद्धार गरेर बेनी पठाएका थिए । दुर्घटनाको बारेमा प्रहरीले अनुसन्धान थालेको जनाएको छ ।
