बेनी, म्याग्दीको रघुगंगा गाउँपालिका–७ गैरावारीमा शनिबार भएको टिप्पर दुर्घटनामा १ जनाको मृत्यु भएको छ ।
घ्यासीखर्क देखि बेनीतर्फ जादै गरेको लु२प ६११२ नम्बरको टिप्पर दुर्घटना हुँदा सव ईञ्जिनियर, चालक र सहचालक घाइते भएका छन् ।
जिल्ला प्रहरी कार्यालय म्याग्दीका प्रहरी निरीक्षक कुमार गुरुङका अनुसार दाङको लमही नगरपालिका–८ उसानिबुका ४० वर्षीय बिरबहादुर चौधरीको घटनास्थलमै मृत्यु भएको हो ।
टिप्परका चालक रुपन्देहीको बुटवलका ४० वर्षीय कमल बज्रचार्य र सहचालक नवलपरासीको त्रिवेणी गाउँपालिका–६ का १८ वर्षीय राहुल सिंह ठकुरीलाई उपचारका लागि पोखरा लगिएको छ ।
नेपाल रेडक्रस सोसाइटी चिमखोला उपशाखाका उपसभापति ओमबहादुर पुनले प्रहरी, सेना, रेडक्रसकर्मी, स्थानीयबासीहरुले घाइतेलाई उद्दार गरि एयर डाइनेष्टिको हेलिकप्टर मार्फत मणिपाल शिक्षण अस्पताल पोखरा लगिएको जानकारी दिनुभयो ।
चिमखोला स्वास्थ्य चौकीमा प्राथमिक उपचार गरि घाइतेलाई पोखरा पठाईएको हो । अर्का घाइते रामेछाप शेर्पा कन्ट्रक्सनका सव ईञ्जिनियरलाई उपचारका लागि बेनी अस्पतालमा पठाइएको पुनले बताउनुभयो ।
चिमखोला–दर्मिजा कच्चि सडक देखि करिब १०० मिटर तल टिप्पर खसेको थियो । दुर्घटनको विषयमा थप अनुसन्धान जारी रहेको प्रहरी निरीक्षक गुरुङले बताउनुभयो ।
तुण्डी हाइड्रोपावर प्रर्वद्धक रहेको मंगले राहुघाट जलविद्युत आयोजनाको ठेकेदार कम्पनी रामेछाप शेर्पा कन्ट्रक्सनको गोदाममा सिमेन्ट पु¥याएर फर्कदै गरेको टिपर दुर्घटनामा परेको हो ।
