बेनी, म्याग्दीको धवलागिरी गाउँपालिका –७ शिवाङमा रहेको हेम नमुना आवासीय माविका विद्यार्थीलाई वातावरणमैत्री चोयाका सामान बनाउने सिप हस्तान्तरण गर्न थालिएको छ ।
मौलिक र परम्परागत सिप हस्तान्तरण, संरक्षण र वातावरणमैत्री चोयाका सामग्रीको प्रयोग बढाउने उद्देश्यले विद्यार्थीलाई तालिम मार्फत सिप हस्तान्तरण गरिएको हो । विद्यालयका शिक्षक नेत्रलाल सुवेदीले स्वास्थ्य शारिरिक तथा सिर्जनात्मक कला विषय अन्र्तगत निगालोबाट चोया र सामान बनाउने सिप सिकाउन ४ दिने तालिम सञ्चालन गरेको जानकारी दिनुुभयो ।
“कक्षा ७ र ८ का विद्यार्थीको इच्छा अनुसार सिपमुलक व्यवहारिक तालिम दिएका हौ,” प्रशिक्षक समेत रहनुभएका शिक्षक सुवेदीले भन्नुभयो “निगालो र बाँसको चोयाबाट डोका, थुन्से, नाङ्लो डाली, थुन्से, भकारी, नाम्लो, नाङ्लो, डाम्लो बनाउन सिकाएका छौ ।”
शिक्षक सुवेदीले चोयाका सामान बनाउने तालिम दिनुभएको हो । विद्यार्थीले तयार पारेको निगालोको चोयाबाट बनेका ‘डस्टविन’ विद्यालयको फोहोर व्यवस्थापनमा प्रयोग गरिएको प्रअ सेरबहादुर केसीले बताउनुभयो ।
अघिल्लो पुुस्ताका नागरिकहरुको मृत्युु, नयाँ पुस्ताका युवा युवतिमा ज्ञान सिप हस्तान्तरण नभएको र पलास्टिकबाट बनेका सामाग्रीको बढ्दो प्रयोगका कारण चोयाबाट बनेका सामग्री र सिप लोप हुने अवस्थामा पुगेको छ । सामान भण्डारण र ढुुवानीमा प्रयोग हुुने चोयाका सामग्रीहरु वातावरणमैत्री हुुन्छन् ।
पलास्टिकका सामानका कारण प्रदुषण बढेकाले विद्यालयका साथै समुदाय स्तरमा चोयाबाट बनेका सामग्री प्रयोग गर्न प्रोत्साहन गरिएको प्रअ केसीले बताउनुभयो । गाउँमै रहेको कच्चा पदार्थको प्रयोगबाट आत्मनिर्भर र वायु प्रदुुषण बढाउने पलास्टिक जन्य सामानको आयात घटाउँछ ।
