बेनी, पाखोबाट खसेको ढुङ्गाले बाटो छेकेपछि म्याग्दीको उत्तरी क्षेत्र हुदै मुस्ताङलाई राष्ट्रिय राजमार्गसँग जोड्ने बेनी –जोमसोम सडक आज दिउँसो देखि अवरुद्ध भएको छ ।
म्याग्दीको अन्नपूर्ण गाउँपालिका–३ रुप्से झरना नजिकै पाखोबाट ठुलो ढुङ्गा खसेर सडकमा सवारी साधन आवत जावतमा अवरोध सिर्जना भएको हो । बेनी–जोमसोम–कोरला सडक आयोजनाका सूचना अधिकारी ईञ्जिनियर बिष्णु चापागाईले बिच सडकमा ठूलो ढुङ्गा आएर बसेकाले सवारी साधन आवत जावत बन्द भएको बताउनुभयो ।
“आज दिउँसो १ बजेतिर ढुङ्गा खसेको हो,” उहाँले भन्नुभयो “बिच सडकमा रहेको ढुङ्गा फुटाएर आवत जावत खुलाउन डोजर र मजदुर परिचालन गरेका छौ ।” सडक खुलाउन करिब तीन घण्टा लाग्ने ईञ्जिनियर चापागाईले बताउनुभयो ।
मुस्ताङबाट म्याग्दी तर्फ आउने सवारी साधन रुप्से र देशका विभिन्न ठाउँबाट मुस्ताङतर्फ जाने सवारी साधनहरु दानाको तितरमा रोकिएका छन् । ७६ किलोमिटर दुरीको बेनी–जोमसोम कोरला सडक राष्ट्रिय गौरवको कालीगण्डकी कोरिडोर सडक आयोजना अन्र्तगत स्तरोन्नतिको क्रममा रहेको छ ।
