बेनी, । पर्वतको जलजला गाउँपालिकाका जेष्ठ नागरिकलाई बागलुङ नगरपालिका ६ मा रहेको धार्मिक स्थल पञ्चकोटमा तिर्थयात्रा गराइने भएको छ ।
पञ्चकोटमा बुधबारवाट सुरु भएको अनन्त श्री ब्रमान्डीय महायज्ञमा जान चाहने जेष्ठ नागरिकहरुलाई निशुल्क धार्मिक भ्रमण गराउने भएको हो । मंगलबार बसेको कार्यपालिका बैठकले ९ वटै वडाका ७० वर्ष माथीका जेष्ठ नागरिकलाई पञ्चकोट भ्रमण लाने निर्णय गरेको थियो ।
भ्रमणमा जान चाहने ७० वर्ष उमेर पुगेका नागरिकको विवरण तयार गरी फागुन १३ गते भित्र पालिकामा पठाउन सबै वडा कार्यालय लाई परिपत्र गरेको छ । फागुन १६ गते वडा भित्रका करिव एक हजार जेष्ठ नागरिकलाई पञ्चकोट भ्रमण गराउने जलजला गाउँपालिकाका अध्यक्ष राजु आचार्यले बताउनुभयो ।
