बाबियाचौर, ः म्याग्दीको मंगला गाउँपालिका–५ हाँडेभिरमा पालिकास्तरीय अस्पतालको भवन निर्माणको काम डेढ वर्षपछि सूचारु भएको छ ।
संघीय सरकारको सबै पालिकामा आधारभूत तहको अस्पताल सञ्चालन गर्ने योजनानुसार वि.स. २०७७ पुुषमा मंगलाको केन्द्र बाबियाचौरसँगै रहेको हाँडेभिरमा शिलन्यास गरिएको भवन निर्माण कार्य पछिल्लो डेढ वर्षयता रोकिएको थियो ।
सरोकारवालाको दवाव र गाउँपालिकाले कारबाही प्रक्रीया अघि बढाएपछि ठेकेदार काममा फर्किएर निर्माण थालेका मंगला गाउँपालिकाका पूर्वाधार शाखाका प्रमुख रुचेन्द्र अधिकारीले बताउनुभयो ।
“धरौटी जफत गरेर ठेक्का तोड्ने र कालोसूचीमा राखेर कारबाहीका लागि सिफारिस गर्ने चेतावनी दिएपछि काममा फर्किएका हुन,” उहाँले भन्नुभयो “कार्यपालिकाको बैठकबाट आगामी असार महिनासम्मको म्याद थप गरेका छौ । कामको प्रगतिको आधारमा भुक्तानी दिन संघीय सरकारसँग बजेटको माग गरेका छौ ।”
डेढ वर्षपछि भवन निर्माण सुचारु भएको मंगला गाउँपालिका–५ का वडा अध्यक्ष भुुपेन्द्र खत्रीले बताउनुुभयो । “निर्माण सकिनुपर्ने समयसम्म दश प्रतिशत भौतिक प्रगति भएको छ,” उहाँले भन्नुुभयो “डिपिसी गरेर ठडाएको पिल्लर लेउ लागेको थियो । ठेकेदारलाई धेरै प्रयास गरेर काममा फर्काएका छौ ।”
भवन निर्माणका लागि ओमबुद्ध इन्टरनेशनल कन्सट्रक्शन काठमाडौंसँग २०७८ असारमा रु. ९ करोड ११ लाखमा ठेक्का सम्झौता गरिएको थियो । भवनको कूल रु. १२ करोड ९७ लाखको लागत अनुमान गरिएको थियो । २०८० असार महिनासम्म भवन निर्माण सम्पन्न गर्ने लक्ष्य थियो ।
३५ वटा कोठा हुुने भवनको विसं २०७७ पुस १५ गते गाउँपालिकाका अध्यक्ष सतप्रसाद रोकाले शिलान्यास गर्नुुभएको थियो । १० शैया क्षमताको अस्पतालका लागि एक हजार १२४ दशमलव ६४ वर्गमिटर क्षेत्रफलमा दुई भवन निर्माण थालिएको थियो ।
आकस्मिक, अन्तरंग, बहिरंग, प्रयोगशाला, प्रशासनिक, औषधि भण्डारण, उपचारका लागि छुट्टाछुट्टै कक्षसहितको भूकम्प प्रतिरोधी क्षमताको अपाङ्गतामैत्री भवन बनाउन लागिएको थियो । निर्माणाधिन भवन गत महिना पोक–नेटा–अर्मन सडकबाट आएको पहिरोले पुुरिएको छ । पहिरो नियन्त्रणका लागि पनि काम भैरहेको प्रमुख प्रशासकीय अधिकृत शिवकुमार पौडेलले बताउनुभयो ।
अस्पतालका लागि अर्मन स्वास्थ्यचौकी परिसरमा पाँच वर्षअघि आठ रोपनी जग्गा व्यवस्थापन गरिएको थियो । मुुख्य र सहायक ठेकेदारको बिवादका कारण भवन निर्माण रोकिएको हो । सहायक ठेकेदारले अधकल्चो बनाएको कामलाई पूूर्णता दिन मुुख्य ठेकेदार आएका हुन् ।
