बेनी, म्याग्दीको बेनी नगरपालिका–४ डाडाखेतमा रहेको बालमन्दिर आधारभूत विद्यालयले आफै तरकारी उत्पादन गरेर दिवा खाजाका लागि प्रयोग गरेको छ ।
विद्यालय परिसरमा करेसाबारी बनाएर दिवा खाजाका लागि आवश्यक पर्ने तरकारी आपुर्ति गरेको हो । विद्यालयका प्रधानाध्यापक रामप्रसाद शर्माले ‘जंक फुड’ निषेध र बालबालिकालाई सिपमुलक शिक्षा प्रदान गर्न करेसाबारीमा तरकारी उत्पादन गरेर खाजामा प्रयोग गरेको जानकारी दिनुभयो ।
“स्थानीय स्तरमा पर्याप्त मात्रामा तरकारी नपाइने हुँदा विद्यालयमै उत्पादन गरेर दिवा खाजामा प्रयोग गरेका छौ,” उहाँले भन्नुभयो “विद्यालय परिसरको खाली जग्गामा तीन ठाउँमा मौसमी, बेमौसमी तरकारी लगाएका छौ । दिवा खाजाका लागि ताजा तरकारी किन्नु परेको छैन् ।”
विदा र छुट्टिको समयमा शिक्षकहरुले तरकारी लगाउने, गोडमेल र पानी लगाउने काम गर्छन् । कक्षा ६, ७ र ८ का विद्यार्थीहरुलाई प्रयोगात्मक कक्षाका लागि करेसाबारीको प्रयोग गरिएको छ । बन्दा, काउली, केराउ, मुला, साग, गाजर, मटरकोसा, सिमी, केराउ प्रजातीको तरकारी लगाएका छन् ।
करेसाबारी निर्माण र व्यवस्थापन गर्न विद्यालयले शिक्षक अर्जुन खत्री, सुनिता गौतम र लक्ष्मी शर्मालाई जिम्मेवारी तोकेको छ । शिक्षक खत्रीले विद्यालयमै उत्पादन भएको तरकारी प्रयोग गर्दा विद्यार्थीले कम खर्चमा पर्याप्त र स्वस्थकर खाजा खान पाउनुका साथै तरकारी खेतीका बारेमा ज्ञान हाँसिल गरेका बताउनुभयो ।
विद्यालयका शिक्षक गौतमले तरकारीमा प्रयोग नहुने बन्दा, मुला र काउलीको पातलाई प्रसोधन गरेर विद्यार्थीहरुले गुन्द्रक बनाएका बताउनुभयो । उहाँका अनुसार विद्यार्थीहरुलाई दुना टपरी बनाउने सिप पनि सिकाइएको छ । स्थानीय पाठ्यक्रमको पठनपाठन गराउने क्रममा विद्यार्थीहरुलाई स्थलगत रुपमा खेतबारी, गोठ र फर्ममा लैजाने गरिएको छ ।
कक्षा ८ सम्म पठनपाठन हुने विद्यालयमा हाल ९२ जना विद्यार्थी छन् । कक्षा ५ सम्मका विद्यार्थीहरुलाई दिवा खाजाका लागि सरकारले प्रति विद्यार्थी रु. १५ अनुदान दिने गरेको छ । विद्यालयका सहयोगीलेनै दिवा खाजाका परिकार तयार पार्ने गर्दछन् ।
अर्का शिक्षक तिर्थबहादुर बानियाले विद्यालय परिसरको खाली जग्गामा तरकारी खेती विस्तार गर्न लागिएको बताउनुभयो । खाली र बाँझो जग्गाको सदुपयोग भएको छ । विद्यालय परिसरमा सौन्दर्यकरण गर्ने उद्देश्यले फुलको बगैचा पनि स्थापना भएको छ । विद्यालय हराभरा बनेको छ ।
रमणीय वातावरणमा व्यवहारिक, जिवनउपयोगी र व्यवसायिक शिक्षा हाँसिल गर्न पाउँदा विद्यार्थीको सिकाई उपलब्धी पनि बढ्न थालेको छ । फुर्सदको समयमा कमजोर सिकाई उपलब्धी भएका विद्यार्थीका लागि उपचारत्मक कक्षा सञ्चालन गरेको छ । आठ जना दरबन्दी, एक जना निजी स्रोतका शिक्षक, एक जना बालविकास र एक जना कर्मचारी छन् ।
