बेनी । म्याग्दीको रघुगङ्गा गाउँपालिका–२, कुनौटादेखि माछखर्क जोड्ने पदमार्ग निर्माण गर्न शुरु भएको श्रमदान अभियानमा समुदायको साथ र सहभागिता बढेको छ ।
बेनी–जोमसोम सडकखण्डअन्तर्गत माछखर्क जाने पुरानो घोरेटोबाटो जीर्ण भएपछि आवतजावत कठिन हुन थालेको भन्दै श्रमदान जुटाएर एक हप्ताअघि पक्की पदमार्ग निर्माण थालिएको थियो ।
नेकपा (माओवादी केन्द्र)को वडा कमिटीले सुरु गरेको श्रमदान अभियानमार्फत उक्त पदमार्ग निर्माणमा स्वदेशमा रहेका स्थानीय श्रमदानमा जुटेका छन् भने प्रवासीले आर्थिक सहयोग गर्न थालेका छन् ।
निर्माण सुरु भएको १० दिन भएको भन्दै श्रमदान र आर्थिक सहयोग गर्नेको सङ्ख्या बढ्दै गएको नेकपा माओवादी केन्द्र भगवतीका वडा कमिटी अध्यक्ष बालकृष्ण कटुवालले बताउनुभयो । “हामीले जीर्ण पदमार्गलाई पुनः निर्माण गर्न अग्रसरता लिएका हौँ । श्रमदानमा सबै जोडिएका छन् । अहिले यो सबैको साझा अभियान बनेको छ”, उनले भने, “देश विदेशमा रहनु भएकाहरुले पनि सहयोग गरिरहनुभएको छ ।”
भिरालो पाखो, पहिरो र वनको झाडी रहेकाले पदमार्गलाई दिगो बनाउन ढलान गरिएको कटुवालले बताए । उनका अनुसार माओवादी केन्द्रका नेता कार्यकर्ताका साथै स्थानीयवासी श्रमदानमा जुटेका छन् ।
ढलानका लागि आवश्यक पर्ने, सिमेन्ट, बालुवा, गिटी र रडको व्यवस्थाका लागि स्वदेशका साथै विदेशमा रहेको भगवतीवासीले आर्थिक सहयोग गरिरहेका कटुवालले जानकारी दिनुभयो । यस पदमार्गको कुनौटादेखि च्युरीबास खण्ड अत्यन्तै जोखिमयुक्त थियो । कुनौटास्थित कालीगण्डकी नदी किनारमा रहेको घाटमा जानका लागि स्थानीय यही पदमार्गमा जोखिमपूर्ण यात्रा गर्नुपर्ने बाध्यता थियो ।
गाउँमा दिवङ्गत भएकाको अन्तिम संस्कारका लागि घाट जाने मुख्य बाटो जोखिमपूर्ण बनेपछि श्रमदानमार्फत पदमार्ग बनाउन थालिएको पदमार्ग निर्माण समितिका संयोजक भगवान केसीले बताउनुभयो । उहाँका अनुसार यस अभियानमा जोडिनेको सङ्ख्या बढ्दै गएको छ ।
“बेनी–जोमसोम सडकखण्ड पुग्न तथा जङ्गलबाट घाँसदाउरा ल्याउनका लागि यही पदमार्गको प्रयोग गरिन्छ”, केसीले भन्नुभयो “विभिन्न सहयोगदाताले आफ्नो आफन्तको स्मृतिमा यो पदमार्ग बनाउने अभियानमा सहयोग गरिरहनु भएको छ । ”
माओवादी को तीन महिने अभियान अन्तर्गत श्रमदानबाट पदमार्ग निर्माण गर्न सुरु गरिएको उक्त योजनामा श्रमदानमा माओवादी केन्द्रका नेता तथा प्रदेश सभा सदस्य हरी बहादुर भण्डारी, जिल्ला इन्चार्ज गुप्त बहादुर हमाल, गाउँपालिका इन्चार्ज सत्य नारायण शेरचन, प्रदेश कमिटी सदस्य रिम कटुवाल लगायत जिल्ला स्तरीय नेता तथा कार्यकर्ताहरु समेत श्रमदानमा सहभागी हुनु भएको थियो ।
