मौवाफाँट, । म्याग्दीको रघुगंगा गाउँपालिकाको केन्द्र मौवाफाँटमा बिहिबार युवाहरुको क्षमता विकास तथा शसक्तिकरणका लागि स्थानीय तहको भूमिका विषयक वक्तृत्वकला प्रतियोगिता सम्पन्न भएको छ ।
रघुगंगा गाउँपालिकाले आयोजना गरेको प्रतियोगितामा म्याग्दीकोअन्नपूर्ण र धवलागिरी गाउँपालिका बाहेकका १२ जनाले सहभागिता जनाएका थिए । रघुगंगा गाउँपालिकाकी आशिका भूजेल प्रथम, बेनी नगरपालिका ८ का अभिषेक पौडेल दृतीय, बेनपा ७ का शिल्पीका जिसी तृतीय र रघुगंगा–२ का अप्सनबहादुर केसी सान्तवना हुनुभएको छ ।
प्रथम, दृतीय, तृतीय र सान्तवना हुनेलाई प्रमाणपत्र सहित क्रमश ः रु. दश हजार, सात हजार, पाँच हजार र तीन हजार नगद पुरस्कार प्रदान गरिएको रघुगंगा गाउँपालिकाका शिक्षा अधिकृत कृष्णप्रसाद सुवेदीले जानकारी दिनुभयो ।
रघुगंगा गाउँपालिका अध्यक्ष भवबहादुर भण्डारी, प्रमुख प्रशासकीय अधिकृत कृष्णप्रसाद ढकाल, जिल्ला शिक्षा विकास तथा समन्वय इकाईका प्रमुुख दलबहादुर थापा, जिल्ला युवा समितिका अध्यक्ष देवीप्रसाद शर्मा (डिपी)ले पुरस्कार वितरण गर्नुभएको थियो ।
गाउँपालिकाका अध्यक्ष भबहादुर भण्डारीले युवा विद्यार्थीहरुको प्रतिभा पहिचान र क्षमता विकासका लागि यस्ता कार्यक्रम उपभोगी र प्रभावकारी देखिएको बताउनुभयो । प्रमुख प्रशासकीय अधिकृत कृष्णप्रसाद ढकालको अध्यक्षता, लेखा अधिकृत खगराज सुवेदीको स्वागत र शिक्षा अधिकृत सुवेदीको सञ्चालनमा सम्पन्न कार्यक्रमको निर्णायक मण्डलको संयोजक बेनी नगरपालिकाका शिक्षा अधिकृत कमलप्रसाद ढकाल रहनुभएको थियो ।
