बेनी
‘लम्पी स्किन’ रोगको महामारीबाट म्याग्दीमा हालसम्म १२० गाईगोरु मरेका छन् ।
जिल्लाभर एक हजार ६६९ गाईगोरु र भैसी लम्पी स्किनबाट बिरामी परेका भेटेरीनरी अस्पताल तथा पशु सेवा विज्ञ केन्द्रले जनाएको छ । केन्द्रका नायव पशु सेवा प्राविधिक गणेश रिजालले म्याग्दीका छ वटै स्थानीय तहमा लम्पी स्किन फैलिएको बताए ।
‘यसअघि गाई, गोरु, बाच्छा र बाच्छीमा मात्र यो रोग देखिएको थियो,’ उनले भने ‘पछिल्लो पटक मंगला गाउँपालिकामा एक वटा भैसीमा पनि लम्पी स्कीन देखिएको छ ।’ तथ्याङ्क अनुसार बेनी नगरपालिकामा ८१, मंगला गाउँपालिकामा ५०, मालिकामा ४३, धवलागिरीमा १५४, रघुगंगामा ४६१ र अन्नपूर्णमा ८८० पशुमा लम्पी स्किन देखिएको छ ।
बेनीमा ९, मालिकामा ४, धवलागिरीमा ४, रघुगंगामा २९ र अन्नपूर्णमा ७४ पशु मरेका छन् । १३ वटा बाच्छाबाच्छी, ३६ वटा गाई, ७१ वटा गोरु मरेका केन्द्रले जनाएको छ । म्याग्दीमा लम्पी स्किन देखिएका मध्य ७.१९ प्रतिशत पशु मरेका छन् । वि.स. २०७९ चैत १३ गते रघुगंगा गाउँपालिकामा जिल्लामा पहिलो पटक लम्पी स्किन देखिएको थियो ।
पछिल्लो पटक अन्नपूर्ण गाउँपालिकामा यो रोग तिब्र रुपमा फैलिएको छ । गोरु बिरामी परेका र मरेका कारण मुख्य खाद्यबाली धान रोपाई प्रभावित भएको अन्नपूर्ण गाउँपालिका–६ घारका कृषक टेकबहादुर खड्काले बताए । ‘गाईहरु बिरामी भएपछि घारमा सञ्चालित चिज उद्योग पनि बन्द भएको छ,’ उनले भने ‘खेती लगाउने बेलामा जोत्ने गोरु नपाएर समस्या भएको छ ।’
ज्वरो आउने र शरिरका फोका देखा पर्ने, पछि झोक्राउँदै जाने, घाँस, खोले नखाने र अन्त्यमा मर्ने गरेका छन् । यो रोग हावाका माध्यमबाट सर्ने बताइएको छ । साथै झिँगाबाट समेत यो रोगको संक्रमण बढ्ने बताइएको छ । यो रोगको उपयुक्त औषधी नभएपनि खोप पहिचान भएको छ । यो रोगका कारण गाई गोरुमा समस्या आउँदा दुध उत्पादनमा असर पर्ने जनाइएको छ ।
लम्की स्किन फैलिन नदिन बेनी नगरपालिकाले निशूल्क खोप लगाउने अभियान सञ्चालन गरेको छ । नगरपालिकका ४०० पशुमा हालसम्म लम्पी स्किन विरुद्धको खोप लगाइसकेको पशु सेवा शाखाका प्राबिधिक प्रदिप गौतमले बताए ।
नगरपालिकाले आन्तरिक स्रोतबाट खोप खरिद गरेर निशूल्क लगाउने व्यवस्था मिलाएको जनाएको छ । प्रदेश सरकारबाट प्राप्त भएको लम्पी स्किनबाट बिरामी भएका पशुलाई खुवाउने एन्टिबायोटिक औषधी स्थानीय तहहरुलाई उपलब्ध गराएको भेटेरीनरी अस्पताल तथा पशु सेवा विज्ञ केन्द्रका निमित्त प्रमुख रामकृष्ण सुवेदीले बताए ।
