म्याग्दी । पहिरोको उच्च जोखिममा रहेका म्याग्दीको अन्नपूर्ण गाउपालिका–४ कोप्चेपानीका २३ घरपरिवारलाई स्थानान्तरण गरिएको छ ।
कालीगण्डकी नदीको किनारमा रहेको बस्तिको माथि रहेको भिरबाट पहिरो खस्न थालेपछि स्थानीयलाई सारिएको हो । पहिरोको उच्च जोखिममा रहेका कोप्चेपानीका २३ घरलाई नजिकैको भालेबास भन्ने ठाउँमा शनिबार सारिएको गाउँपालिकाका अध्यक्ष डमबहादुर पुनले जानकारी दिउनुभयो ।
‘बस्ती माथिको भिरमा जमिन चिरा परेर पहिरो खसेको हो,’ उहाले भन्नुभयो ‘बस्तीनै पुरिने खतरा भएकाले स्थानीयलाई सुरक्षित ठाउँमा सारिएको हो ।’ असार महिनादेखिनै सुरु भएको पहिरो पछिल्लो हप्ताको निरन्तर बर्षापछि थप सक्रिय भएको छ ।
स्थानीयको व्यक्तिगत जग्गामा टहरा बनाएर अस्थाई बसोबासको ब्यवस्था मिलाइएको छ । सबै परिवारलाई एक÷एक वटा त्रिपालले छाएको टहरा बनाएर राखिएको छ । जिल्ला प्रशासन कार्यालयले १५ थान त्रिपाल र एक रोल म्याट्रेस उपलब्ध गराएको छ ।
आठ वटा त्रिपाल उपलब्ध गराएको गाउपालिकाले प्रति परिवार एक÷एक वटा कम्बल सहयोग गर्ने र सार्वजनिक शौचालय बनाइदिने भएको छ । गाँउपालिकाका अध्यक्ष पुन, प्रमुख प्रशासकीय अधिकृत नबिन सुबेदी, वडा अध्यक्ष चन्द्रप्रकाश फगामी, कार्यपालिका सदस्य पबित्रा खड्का लगायतको टोली पहिरो प्रभावित क्षेत्रमा पुगेर टहरा निर्माणमा सहजिकरण गर्नुभएको थियो ।
घरका महत्वपूर्ण कागजात, अन्नपात, लत्ताकपडा सहित महत्वपूर्ण सामान टहरामा सारेका छन् ।स्थलगत निरिक्षणका क्रममा जुनसुकै बेला पहिरो खस्न सक्ने देखिएपछि बस्तिनै स्थानान्तरणको योजना बनाइएको वडा अध्यक्ष फगामीले बताउनुभयो । ‘पहिरोबाट मानवीय र भौतिक क्षति हुन नदिन सतकर्ता अपनाएका हौ,’ उनले भने ‘कोप्चेपानीबासीलाई भालेबासमै स्थाई बसोबासका लागि एकिकृत आवासको योजना अघि सारेका छौ ।’
यसअघि २०७५ साउनमा कालीगण्डकीमा आएको बाढीले कोप्चेपानी स्थित धवलागिरी आधारभूत विद्यालयको भवन, खेलमैदान र स्थानीयको खेतियोग्य जमिन बगाएको थियो । कालीगण्डकीको कटान र भिरबाट खस्ने पहिरोका कारण त्रसित भएको स्थानीय सुकबहादुर रोकाले बताउनुभयो ।
अन्नपूर्ण गाउपालिकाले पहिरोको उच्च जोखिममा रहेको वडा न. ३ फगामका १३ घरधुरीलाई पनि अस्थाई टहरा बनाएर अन्यत्र सारेको छ । कालीगण्डकीको तिर देखि गाउँको शिरसम्मको जमिन चिरा चिरा परेर पहिरो बग्न थालेपछि करिब ४० घरको बसोबास भएको फगाम उच्च जोखिममा परेको छ ।
यसअघि वि.स २०७२ जेठमा बैसरीको पहिरो खस्दा सतकर्ता अपनाएर पहिल्यै मानिसहरुलाई सारिएकाले मानबीय क्षति हुन पाएको थिएन् । राम्चेको डाडाबाट खसेको पहिरोले कालीगण्डकी नदी १७ घण्टा थुनिएको थियो भने बैसरीका २९ घर पुरिएका थिए । मानिसलाई घर छाड्न लगाएका कारण डेढ सय जनाको ज्यान बचेको थियो ।
