बेनी, । छाडा कुकुर नियन्त्रण गर्न बुधबार बेनीमा शिविर आयोजना गरेर कुकुरको बन्ध्याकरण गरिएको छ ।
छाडा छोडिएका सामुदायिक कुकुरको सन्तान बृद्धि रोक्न भेटेरिनरी अस्पतालमा आयोजना गरिएको शिविरमार्फत ९४ वटाको बन्ध्याकरण गरिएको हो । भेटेरिनरी अस्पताल तथा पशुसेवा विज्ञ केन्द्र म्याग्दी र बेनी नगरपालिकाको आयोजनामा संचालन गरिएको शिविरमा प्राविधिक सहयोग केन्द्रिय रिफरल पुश चिकित्सालयले गरेको थियो ।
३१ वटा सामुदायिक र ६३ वटा घरपालुवा कुकुरको बन्ध्याकरण गरिएको केन्द्रका सूचना अधिकारी रामकृष्ण सुवेदीले जानकारी दिनुभयो । “पशु अधिकार ऐन अन्तरगत कुकुर मार्न पाईदैन्, दिनको शिविर मार्फत सामुदायिक र घरपालुवा कुकुरको बन्ध्याकरण गरिएको हो ।”
कुकुरको संख्या बृद्धिमा नियन्त्रण गराउन विगतको शिविरले सहयोग पुगेको कारण यसलाई निरन्तरता दिएको भेटेरीनरी अस्पताल तथा पशु सेवा विज्ञ केन्द्रका प्रमुख जिवनप्रसाद आचार्यले बताउनुभयो ।
“सडकमा हिड्ने पैदलयात्री, मोटरसाईकल सवारलाई छाडा कुकुरले दुःख दिएका छन्,” उहाँले भन्नुभयो “संख्या घटाउनुका साथै रेविज रोग नियन्त्रणमा बन्याकरण शिविरले सहयोग गरेको छ ।”
बेनी नगरपालिकाका मेयर सुरत केसीले बजार क्षेत्रमा कुकुरको ब्यवस्थापन र संख्या बृद्धि रोक्नका लागि शिविरले सहयोग पुग्ने बताउनुभयो । केन्द्रिय रिफरल पशु चिकित्सालयका पुश डाक्टर टंकप्रसाद प्रसाई, डाक्टर अर्जुन अर्याल र डाक्टर विकास गिरी सहित ८ जनाको टोलीले कुकुरको बन्ध्याकरण गर्नुभएको थियो । सामुदायिक कुकुर बोक्ने एम्वुलेन्स पनि शिविरमा उपलब्ध थियो ।
