बेनी । बेनी बजारको क्याम्पसचोकमा बिहिबार साँझ साढे ४ बजेतिर नेपाली काँग्रेस र नेकपा माओवादी केन्द्रका कार्यकर्ताहरु भेला भएका थिए ।
नेपाली काँग्रेस म्याग्दीमा सभापति तथा प्रतिनिधसभा सदस्यका उमेद्वार खमबिर (खम्बिर) गर्बुजा प्रदेशसभा सदस्यका उमेद्वार नेकपा माओवादी केन्द्रका युवा नेता हरि भण्डारी र राष्ट्रिय योजना आयोगका पुर्व उपाध्यक्ष तथा माओवादी केन्द्रका प्रतिनिधि सभा सदस्यमा समानुपातिक उमेद्वार डा. मिनबहादुर श्रेष्ठलाई साथमा लिएर आइपुग्नुभयो ।
रघुगंगा गाउँपालिका–१ बेग र भगवतिको चुनावी सभालाई सम्बोधन गरेर गठबन्धनका उमेद्वारहरुको टोली बेनीमा आएको थियो । नेपाली काँग्रेसका कार्यकर्ताले माओवादी र माओवादीका कार्यकर्ताले नेपाली काँग्रेसको चुनाव चिन्ह र झण्डा समाएका थिए । पृष्ठभूमिमा गित र वाम–लोकतान्त्रिक गठबन्धनका उमेद्वारहरुलाई मतदान गर्न अपिल गरिएको जिंगल बजिरहेको थियो ।
कार्यकर्ताहरुले नमुना मतपत्र र उमेद्वार तथा पार्टीका अपिल संयुक्त रुपमा बाडेका थिए । पिपलचोक, अस्पताल चोक, बसपार्क र कालीपुलको पुरानो टोलमा घरदैलो गरेका थिए । तेस्रो पटक चुनावी मैदानमा उत्रिएका खम्बिर मतदातामाझ परिचित जस्तो देखिन्थे ।
बजारबासीलाई नाता लगाएर बोलाउदै हिडेका खम्बिरलाई मिनबहादुर र हरिले पछ्याइरहनु भएको थियो । रघुगंगा २ भगवतिमा जन्मिएपनि दश वर्षदेखि बेनीमै बस्दै आएका हरि पनि मतदातामाझ परिचित देखिनुहुन्थ्यो ।
खम्बिरले मिनबहादुरलाई चिनाउदै हुनुहुन्थ्यो । माओवादीको समानुपातिक उमेद्वारको सूचिमा प्राथमिकतामा रहेका मिनबहादुरलाई खम्बिरले भावी अर्थमन्त्रीको रुपमा प्रचार गर्दै आउनुभएको छ । घरदैलोको नेतृत्व नेपाली काँग्रेसका बेनपा ८ का वडा सभापति हिमबहादुर भण्डारीले गर्नुभएको थियो ।
उमेद्वारहरुलाई मतदाताले आर्शिवाद र शुभकामना दिएका थिए । एक जना वृद्धा भन्दै हुनुहुन्थ्यो “यसअघि दुई चोटी पराजित भयौ, यसपाली गठबन्धनको साथ पाएका छौ, चुनाव जित्नु शुभकामना छ ।” नेता कार्यकर्ताहरुले जिल्ला सदरमुकामबाट एक अर्का पार्टीको झण्डा बोकेर र बजारमा संयुक्त घरदैलो गरेर गठबन्धन बलियो भएको सन्देश दिन खोजेको देखिन्थ्यो ।
“लगातार दुई पटक चुनाव हारेपनि हरेस खाइन, यसपाली गठबन्धनले साझा उमेद्वार बनाएको छ,” खम्बिरले चुनावी सभामा बोल्ने शब्दहरु दोहो¥याउदै भन्नुभयो “यसपाली देशैभरी गठबन्धनको लहर छ । म्याग्दीमा पनि जता गयो त्यही खम्बिर, खम्बिर, हरि हरि, सुविन, सुविन भनेका छन् । चुनाव जित्ने माहौल बनेको छ । अरुले भन्दा फरक तरिकाले तपाईहरुले महशुस गर्ने गरी कानुन निर्माण र जिल्लाको विकासमा भूमिका खेल्नेछु ।”
काँग्रेस, माओवादी, नेकपा एकिृत समाजवादी र राष्ट्रिय जनमोर्चाको गठबन्धनबाट उमेद्वार बनेका गर्बुजा र नेकपा एमालेका गण्डकी प्रदेश कमिटिका सचिवालय सदस्य हरिकृष्ण श्रेष्ठ मंसिर ४ गते हुने संघ र प्रदेशसभा सदस्य निर्वाचनमा मुख्य प्रतिस्पर्धी देखिनुभएको छ ।
प्रदेशसभा क्षेत्र (क)मा गठबन्धनबाट भण्डारी र नेकपा एमालेका जिल्ला अध्यक्ष देवेन्द्रबहादुर कटुवाल मुख्य प्रतिस्पर्धीको रुपमा देखिनुभएको छ । क्षेत्र (ख) मा गठबन्धनबाट माओवादीका जिल्ला संयोजक रेशम जुग्जाली (सुविन) र नेकपा एमालेका गण्डकी प्रदेश कमिटि सदस्य यामबहादुर गर्बुजा प्रमुख प्रतिस्पर्धीका रुपमा देखिनुभएको छ ।
एमालेका उमेद्वार श्रेष्ठ र केसीले बेनीमा घरदैलो गरेर चुनाव प्रचार अभियान शुरु गर्नुभएको थियो । ग्रामिण क्षेत्रसम्म गठबन्धन, एमाले, राप्रपा, स्वतन्त्र, मंगोल नेशनलका उमेद्वारहरुले प्रचारप्रसारलाई तिब्रता दिएपछि चुनावी वातावरण तात्न थालेको छ ।
