बेनी, १७ असोज । म्याग्दीमा नवौ राष्ट्रिय खेलकुद प्रतियोगिताको ८० प्रतिशत तयारी पुरा भएको छ ।
असोज २७ देखि कात्तिक ३ गतेसम्म गण्डकी प्रदेशमा सञ्चालन हुने नवौ राष्ट्रिय खेलकुद प्रतियोगिता अन्तरगत म्याग्दीको बेनीमा महिला भलिबल र तेक्वान्दोको प्रतिस्पर्धा हुदैछ । जिल्ला खेलकुद विकास समितिले खेलमैदान निर्माण, मर्मत, खेलाडीको आवास र अभ्यास स्थलको व्यवस्थापन गरिएको जनाएको छ ।
समितिका अध्यक्ष दिनेश केसीले भलिबल सञ्चालन हुने बेनीको खुल्ला मञ्च खेलमैदानमा दुई वटा भलिबल खेल्ने मैदान र प्याराफिट रंगरोगन गरिएको जानकारी दिनुभयो ।
“खेलमैदानको ढुंगा सहितको माटो खनेर फालेर बाहिरबाट माटो ल्याएर हाली रोलरले फेलेर सम्माएका छौ,” उहाँले भन्नुभयो “बेनी नगरपालिकाले बनाएको खुल्लामञ्चको प्याराफिटमा रेलिङ हालेर रंग लगाउने काम सकिएको छ ।”
जिल्ला भलिबल संघकोको प्राविधिक सहयोगमा खेलमैदान तयार पारिएको हो । संघका अध्यक्ष तेजेन्द्र बानियाले खेलमैदान तयार पार्ने काम ८० प्रतिशत सकिएको र बाँकी काम दशै पनि गरिने बताउनुभयो । राष्ट्रिय प्रतियोगिता सञ्चालन हुने भएपछि म्याग्दीको खेलाडीहरु उत्साहीत भएर तयारीमा लागेको बानियाले बताउनुभयो ।
राखेपले पठाएको रु. पाँच लाख बजेटबाट खुल्ला मञ्चमा खेलमैदान तयार पारिएको हो । तेक्वान्दो प्रतियोगिता सञ्चालन हुने कालीपुलको कवर्डहलमा पंखा, वत्ती जडान, शौचालय, सयनकक्ष मर्मत, रंगरोगन र भवन अगाडी ढलान गरिएको जिल्ला खेलकुद विकास समितिका प्रशिक्षक कर्ण प्रधानले बताउनुभयो ।
बेनी नगरपालिकाले बिनियोजन गरेको रु. तीन लाख बजेटबाट तेक्वान्दो प्रतियोगिता सञ्चालन हुने कालीपुल कवर्डहलको मर्मत गरिएको हो । प्रतियोगितामा खेलाडी, प्रशिक्षक र व्यवस्थापनका लागि ११ वटा टिमका ६१७ जना म्याग्दीमा आउदैछन् ।
होटल व्यवसायी संघको समन्वयमा खेलाडीलाई राख्ने होटल व्यवस्थापन भएको छ । बेनी नगरपालिकाको ७ र ८ नम्बर वडा कार्यालयले अतिथि सत्कार, सरसफाई, झाँकी प्रर्दशनीका लागि विभिन्न उपसमिति बनाएर तयारी गरेका छन् ।
