![](https://dhaulagirikhabar.com/wp-content/uploads/2022/08/Rastriya-khelkud.jpg)
![Add Samajik bikash office](https://dhaulagirikhabar.com/wp-content/uploads/2024/06/Add-Samajik-bikash-office-3.jpg)
बेनी,। नवौ राष्ट्रिय खेलकुद प्रतियोगिता अन्तरगत म्याग्दीको बेनीमा महिला भलिबल र तेक्वान्दो खेल सञ्चालन हुने भएको छ ।
राष्ट्रिय खेलकुद परिषद्ले असोज २८ देखि कात्तिक ३ गतेसम्म गण्डकी प्रदेशका विभिन्न जिल्लामा नवौ राष्ट्रिय प्रतियोगिताका खेल सञ्चालन गर्ने स्थान छनौट गरेको हो । जिल्ला खेलकुद विकास समिति म्याग्दीका अध्यक्ष दिनेश केसीले राखेपले बेनीमा महिला भलिबल र तेक्वान्दोको प्रतियोगिता सञ्चालन गर्न छनौट गरेको जानकारी दिनुभयो ।
“हाम्रो माग र प्रस्ताव अनुसार राखेपले महिला भलिबल र तेक्वान्दोको राष्ट्रिय प्रतियोगिता सञ्चालन गर्ने अवसर म्याग्दीलाई दिएको छ,” उहाँले भन्नुभयो “जनप्रतिनिधी, निजी, सामाजिक क्षेत्र लगायत सबै क्षेत्रको साथ र सहयोगबाट व्यवस्थित दंगले प्रतियोगिता सम्पन्न गराउने तयारीमा जुटेका छौ ।”
![Shreekrishna hardwear in news](https://dhaulagirikhabar.com/wp-content/uploads/2023/10/Shree-Krishna-Hardware.gif)
![Bhautik ministry notice about road](https://dhaulagirikhabar.com/wp-content/uploads/2023/10/Bhautik-ministry-notice-scaled.jpg)
राष्ट्रिय खेलकुद परिषद्का सदस्य राजेश गुरुङ लगायत प्राबिधिक टोलीले विभिन्न चरणमा म्याग्दी आएर खेल सञ्चालनका लागि सम्भावना अध्ययन र सरोकारवालासँग छलफल गरेका थिए । खुल्ला मञ्च खेलमैदानमा महिला भलिबल र कालीपुलको कवर्डहलमा तेक्वान्दोको प्रतियोगिता सञ्चालन गरिने भएको छ ।
खेलमैदानको तयारी र कवर्डहल मर्मत थालिएको खेलकुद विकास समितिका अध्यक्ष केसीले बताउनुभयो । कवर्डहल मर्मतका लागि बेनी नगरपालिकाले बजेट व्यवस्थापन गरेको छ । म्याग्दीमा पहिलो पटक राष्ट्रिय खेलकुद प्रतियोगिता अन्तरगतको खेल सञ्चालन हुन लागेको हो ।
प्रतियोगितामा सात वटा प्रदेश, तीन वटा विभागीय र गैरआवासीय नेपाली संघका ११ टिम सहभागी हुनेछन् । ५०० जना भन्दा बढी खेलाडीहरु खेल्दका लागि बेनीमा आउनेछन् । खेलकुद प्रतियोगिता सञ्चालन हुँदा बेनीमा खेल पर्यटनको पनि विकास हुने अपेक्षा गरिएको छ ।
![Gandaki dadelo notice](https://dhaulagirikhabar.com/wp-content/uploads/2023/05/Add-aantarik-mamila-upabhokta.jpg)