धाइरीङ, पर्वतको जलजला गाउँपालिका–७ को धारापानी गाउँमा विद्युत वितरणका लागि जडान भएको ट्रान्सफर्मरबाट २२० भोल्टेज विद्युत प्रवाह हुनुपर्नेमा त्यो भन्दा बढी विद्युत प्रवाह हुँदा सोमबार एक जनाको मृत्यु र १३ जना घाइते भएका छन् ।
धारापानीकी ५० वर्षीय सिता क्षेत्रीको मृत्यु हुनुका साथै प्रताप शर्माको गोठका १६ वटा बाख्रा करेन्ट लागेर मरेका मिलनचोक प्रहरी चौकीले जनाएको छ । घटनास्थल पुगेका चौकीका ईञ्चार्ज मुक्त खड्काले तारको क्षमता भन्दा बढी मात्रामा विद्युत प्रवाह हुँदा दुर्घटना भएको बताउनुभयो ।
१५० भन्दा बढी घरमा जडान भएको विजुलीको मिटरबक्स जलेपछि विद्युत आपुर्ति बन्द भएको छ । हाइभोल्टेज विद्युत प्रवाह भएपछि गाउँभरिको वितरण लाइनको तारमा आगो बलेको थियो । विजुलीको तारले रुख छोएको छ ।
क्षमता भन्दा बढी मात्रामा विद्युत आपुर्ति हुँदा ट्रान्सफर्मरबाट नियन्त्रण गर्ने एमसिपी नभएका कारण दुर्घटना भएको स्थानीयबासी दिपक आचार्यले बताउनुभयो । बिहानै देखि र यसअघि पनि तारमा आगो बल्ने समस्या भएको र ट्रान्सफर्मरमा एमसिपी राख्न माग गरेपनि विद्युत प्राधिकरणले सुनुवाई नगरेको उहाँको भनाई छ ।
मृतक र घाइतेलाई बिजुलीको तारमा आगो बलेको देखेपछि घरको मिटरबक्स बन्द गर्ने क्रममा करेन्ट लागेको स्थानीय प्रताप शर्माले बताउनुभयो । हाइभोल्टेज विद्युत प्रवाह भएको विजुलीको तार छिनेर खोरमा खरेर जमिनमा करेन्ट प्रवाह हुँदा शर्माले पालेका बाख्रा मरेका हुन् ।
गाउँपालिका, वडाका जनप्रतिनिधी, मिलनचोक प्रहरी चौकीका सुरक्षाकर्मी र स्थानीयबासीहरुले घाइतेलाई उद्दार गरेर बेनी अस्पताल पठाएका थिए । गाउँपालिकाका अध्यक्ष राजुप्रसाद आचार्य, उपाध्यक्ष दिपक आचार्य, वडा अध्यक्ष टुंगनाथ शर्माको टोली घटनास्थलमा पुगेर समन्वय र सहजिकरण गर्नुभएको थियो ।
मृतकको शव परिक्षणका लागि कुश्माको पर्वत अस्पतालमा लगिएको छ । १३ जना घाइतेहरु बेनी अस्पतालमा उपचार पछि घर फर्किएका छन् । उनिहरु खतरामुक्त रहेका बेनी अस्पतालले जनाएको छ ।
जोखिमको बारेमा समयमा सूचना नआउँदा जोखिमयुक्त ट्रान्सफर्मर र विजुलीको लाइन मर्मत गर्न नसकिएको नेपाल विद्युत प्राधिकरण पर्वत बितरण केन्द्रले जनाएको छ । जोखिमयुक्त लाइनको समयमा पहिचान, मर्मत र व्यवस्थापन नगर्दा विद्युतीय दुर्घटनाको जोखिम बढेको धारापानीबासीको भनाई छ ।
