बेनी, । म्याग्दीको पर्यटकीय स्थल टोड्के जोड्ने नयाँ पदमार्ग पहिचान भएको छ ।
मंगला गाउँपालिकाले पहिचान गरेको सिमलचौर–लामोछहरा–फलामेगुफा, महादेव गुफा–पूर्णगाउँ हुदै टोड्के जोड्ने पदमार्गको विस्तृत परियोजना प्रतिवेदन (डिपिआर) बनाएर पूर्वाधार निर्माण थालेको हो ।
स्थानीयबासीले लेकबेशी गर्न प्रयोग गर्ने बाटोलाई पर्यटकीय पदमार्गको रुपमा विकास गर्न पूर्वाधार बनाउन थालिएको सिमलचौर–टोड्के पदमार्ग निर्माण समितिका सचिव अशोक पौडेलले बताउनुभयो ।
“चालु आर्थिक वर्षमा मंगला गाउँपालिकाले बिनियोजन गरेको बजेटले सिमलचौरबाट पदमार्ग निर्माण थालिएको छ,” उहाँले भन्नुभयो “सडक बनेपछि विस्थापित भएको पुरानो बाटोलाई पर्यटकीय पदमार्ग बनाउन थालेका हौ ।”
यस वर्षको रु. ३ लाख पचास हजार बजेटले प्रवेशविन्दुमा पर्ने सिमलचौरमा ढुङ्गा, सिमेन्ट र बालुवा प्रयोग गरेर १०० मिटर पदमार्ग बनाइएको गाउँपालिकाका प्राविधिक विपिन आचार्यले बताउनुभयो बताउनुभयो । पदमार्गको साथै सुचनामुलक बोर्ड र प्रतिक्षालय बनाइएको छ ।
प्राकृतिक उपचार स्थल तातोपानी भ्रमणमा आउने पाहुनालाई टोड्के र टोड्के पुगेका पर्यटकलाई तातोपानी भित्र्याउन यो पदमार्ग प्रभावकारी हुने अपेक्षा गरिएको छ । बेनी–दरवाङ सडकको सिमलचौर देखि नेवारेखोलाको दायाँ किनारै किनार लामोछहरा, फगामेगुफा, महादेव गुफा, पूर्णगाउँ हुदै टोड्के पुग्ने पदमार्गको बनाउन लागिएको हो ।
सिमलचौर देखि दुई घण्टा पचास मिनेट उकालो बाटो हिडेपछि टोड्के पुग्न सकिन्छ । पदमार्गमा लामोछहरा, फलामे र महादेव गुफा पर्दछन् । अग्लो पहाडबाट खस्ने लामोछहरा आकर्षक र मनमोहक छ ।
फलामे गुफाबाट परापुर्व कालमा फलाम निकाल्ने गरिएको पदमार्ग निर्माण समितिका अध्यक्ष दिर्घबहादुर खड्काले बताउनुभयो । महादेव गुफाभित्र शिवको मुर्ति लगायत विभिन्न कलात्मक दृष्य अवलोकन गर्न सकिन्छ । समुन्द्रि सतहदेखि दुई हजार २०० मिटरको उचाईमा रहेको टोड्के मंगला, रघुगंगा गाउँपालिका र बेनी नगरपालिकाको सिमानामा अवस्थित छ ।
गुराँसको जंगलको बिचमा पहाडको टाकुरामा समथर भूगोलमा रहेको सुर्योदय, हिमशृङखला, पहाडी भूगोलको दृष्य अवलोकन गर्न सकिन्छ । हाल रघुगंगाको झिँ, बेनीको वाखेत, मंगलाको पूर्ण गाउँ हुदै टोड्के जाने पदमार्ग र सडक सञ्चालनमा छन् ।
