बेनी । म्याग्दीको धवलागिरी गाउँपालिका वडा नम्बर १ गुर्जाका जनप्रतिनिधीहरुले भगिनी र मितेरी सम्बन्ध कायम गर्ने योजना अघि सारेका छन् ।
नवनिर्वाचित जनप्रतिनिधीहरुको पहिलो बैठकले अनुभव आदान प्रदान र अनुशरणका लागि भगिनी र मितेरी सम्बन्ध बनाउने निर्णय गरेका हुन् । भौतिक पूर्वाधार, कृषि, पशु, वन, पर्यापर्यटन लगायतको क्षेत्रमा उदाहरणीय बनाउन त्यस्तै क्षेत्रमा नमुना काम गरेका पालिका र वडाहरुसँग भगिनी र मितेरी सम्बन्ध विस्तार गर्ने निर्णय गरिएको गुर्जाका वडा अध्यक्ष झकबहादुर छन्त्यालले बताउनुभयो ।
पालिका र सम्बन्ध निकायमा गरिएको प्रस्ताव स्विकृत गरेर भगिनी र मितेरी सम्बन्ध विस्तारको काम अघि बढाइने उहाँले बताउनुभयो । यसैगरी वडाका जनप्रतिनिधीहरुको कार्य विभाजन पनि भएको छ । वडा अध्यक्ष छन्त्याललाई वडाका दैनिक, प्रशासन, योजना अनुगमन, नियमन, नियन्त्रण, सरोकारवाला संघ संस्थाहरुसँग सम्पर्क, समन्वय, सहकार्य लगायतका कार्यको जिम्मेवारी तोकिएको छ ।
वडा सदस्य सतमाया विकलाई टोल सुधार समिति गठन, परिचालन, स्थानीय योजना अनुगमन, नियमन, वडा सदस्य केआईसिंह छन्त्याललाई टोल सुधार समिति गठन, परिचालन, योजना अनुगमन, नियमन, स्थानीय पुजा व्यवस्थापन र अर्का सदस्य गुनराम छन्त्याललाई शिक्षा, बालबालिका, खानेपानी, टोल सुधार समिति गठन, परिचान, योजना अनुगमन र नियमनको जिम्मेवारी तोकिएको छ ।
कार्यपालिका सदस्य सिताकुमारी छन्त्यालले स्वास्थ्य, सरसफाई, खानेपानी, महिला बालबालिका, कार्यपालिका सदस्य भविन्द्र छन्त्यालले विकृति, विसंगति, कुलत नियन्त्रणको जिम्मेवारी पाउनुभएको छ । यसैगरी गुर्जामा आगामी आर्थिक वर्ष २०७९÷०८० मा सञ्चालन हुने योजना तथा कार्यक्रम संकलन गरिएको छ । जनप्रतिनिधीहरुको उपस्थितिमा टोल भेला गरेर गाउँपालिकामा पेश गरिने विषयगत र प्रदेश तथा संघीय सरकारमा माग गर्ने योजना तर्जुमा गरिएको हो ।
