बेनी,। नेकपा एमालेले आगामी बैशाख ३० गते हुने स्थानीय तह चुनावलाई लक्षित गरेर बेनपा–६ अर्थुङ्गे देउरालीमा वडा कार्यालय स्थापना गरेको छ ।
कार्यालयको आइतबार उद्घाटन गर्दै नेकपा एमाले केन्द्रिय सदस्य एवम म्याग्दी जिल्ला इन्चार्ज भूपेन्द्र थापाले ५ दलीय गठबन्धनको बिरुद्धमा एमालेले एक्लै चुनावी मैदानमा उत्रिने दावी गर्नुभयो ।
एमालेले बेनी–६ मा वर्तमान वडा अध्यक्ष कृष्णसिंह बानियालाई दोहोराउने निर्णय गरेको छ । वडा सदस्यहरुमा कृष्णदत्त पौडेल, इश्वर पौडेल, राधिका विश्वकर्मा र शारदा राना मगरलाई उमेद्वार चयन गरेको छ ।
एमाले गण्डकी प्रदेश कमिटी सदस्य हरिकृष्ण श्रेष्ठ, प्रमोद श्रेष्ठ, सन्तोष रावल, जिल्ला सचिव सुरज केसी, सदस्य पशुपति शाही, नारायण शर्मा, बेनी नगर कमिटी अध्यक्ष नारायण जिसी लगायतले चुनावको अवधिमा बेनपा ६ का सम्पूर्ण नेता तथा कार्यकर्ताहरु एक भएर अभियानमा लाग्न निर्देशन दिनुभयो ।
कार्यालय स्थापना भएपछि अव उम्मेदवारहरु सहित चुनावी प्रचारको अभियान लिएर टोल टोलमा पुग्ने योजना तय गरिएको नेकपा एमाले वडा कमिटी अध्यक्ष गणेशबहादुर बानियाँले बताउनुभयो । वडा कमिटी उपाध्यक्ष दिपक हमालको अध्यक्षता, नगर कमिटी उपसचिव लक्ष्मण कटुवालको संचालनमा कार्यक्रम सम्पन्न भएको थियो ।
