बेनी, । नेकपा माओवादी कन्द्रले आसन्न स्थानीय तह निर्वाचनमा धवलागिरि गाउँपालिका ७ को वडा अध्यक्षमा अशोक खत्रीलाई उमेद्वार बनाउने भएको छ ।
वडा कमिटीको बुधबार बसेको बैठकले सर्वसम्मत रुपमा खत्रीलाई उम्मेदवार बनाउने निर्णय गरेको छ । पार्टीको वडा कमिटी अध्यक्ष समेत रहनुभएका खत्रीलाई अध्यक्ष पदको उम्मेदवार चयन गरिएपनि अन्य सदस्यहरुको टुंगो भने सबै क्षेत्रलाई समेटेर छिट्टै लगाउने तयारी गरिएको छ ।
पार्टीको गाउँपालिका कमिटीका अध्यक्ष यामन रोका, इन्चार्ज खुमनाथ सुवेदी, सचिव रेशम पुनको उपस्थितिमा बसेको बैठकले वडामा पार्टीका उम्मेदवारहरुलाई बिजयी गराउन प्रचार प्रसारलाई समेत तिब्रता दिने निर्णय गरेको छ । खेलाडीको समेत पहिचान बनाउनुभएका खत्रीका परिवारले वडा कार्यालय भवन निर्माणको लागि जग्गा समेत उपलब्ध गराउनुभएको थियो । ताकममा सडक पु¥याउन खत्रीका दाजु दलबहादुरको महत्वपूर्ण योगदान रहेको छ ।
यस अघि माओवादी केन्द्रले धवलागिरी गाउँपालिका– ६ मराङमा चक्र पुन, रघुगंगा गाउँपालिका– २ भगवतीमा नरबहादुर भण्डारी, मालिका गाउँपालिका–१ निस्कोटमा तिलक पुन, मालिका गाउँपालिका–४ मा रेशम पुनलाई अध्यक्ष पदको उम्मेदवार टुंगो लगाइसकेको छ ।
त्यसैगरि बेनी नगरपालिका– ३ भकिम्लीमा हालका वडा अध्यक्ष पदम पुन र अन्नपुर्ण गाउँपालिका– २ का वडा अध्यक्ष ओमप्रसाद फगामीलाई पुनः वडा अध्यक्ष पदको उम्मेदवारमा दोहोराउने निर्णय गरेको छ ।
विस २०७४ सालको स्थानीय तहको चुनावमा आफूले जितेका ७ वटा वडालाई बचाउदै थप वडा र पालिका जित्ने लक्ष्य सहित चुनावी अभियान संग संगै उम्मेदवार छनौटलाई समेत तिब्र पारिएको माओवादी केन्द्र म्याग्दीका जिल्ला संयोजक रेशम जुग्जाली (सुविन)ले जानकारी दिनुभयो । जिल्ला संयोजक जुग्जाली मालिका गाउँपालिकाको अध्यक्ष पदमा उम्मेदवारी दिने तयारीमा जुट्नुभएको छ ।
