बेनी । जनप्रतिनिधि र कर्मचारीमा कोरोना संक्रमण पुष्टि भएपछि म्याग्दीको रघुगंगा गाउँपालिकाको अत्यावश्यक बाहेकका सेवा स्थगित गरिएको छ ।
गाउँपालिकाकाजनप्रतिनिधी र छ जना कर्मचारीहरुमा कोरोना पुष्टि भएपछि माघ १२ गतेसम्मको लागि पालिकाबाट प्रवाह हुने अत्यावश्यक बाहेकका सेवा स्थगित गरिएको प्रमुख प्रशासकीय अधिकृत अमृत सुवेदीले जानकारी दिनुभयो ।
त्यसैगरि गाउँपालिकाभित्रका शैक्षिक संस्थाहरुमा भौतिक रुपमा गरिने पठनपाठनलाई माघ १५ गतेसम्मलाई बन्द गरिएको प्रमुख प्रशासकीय अधिकृत सुबेदीद्धारा जारी बिज्ञप्तिमा उल्लेख छ । यसअघि ज्ञानोदय माध्यमिक विद्यालयमा अध्ययनरत शिक्षक र विद्यार्थीमा कोरोना संक्रमण पुष्टि भएपछि १० दिनका लागि विद्यालय बन्द गरिएको थियो ।
रघुगंगामा बुधवार सम्म सक्रिय कोरोना संक्रमितको संख्या ३७ जना रहेका छन् गाउँपालिकाले सार्वजनिक अपिल जारी गर्दै घर बाहिर निस्कँदा अनिवार्य रुपमा स्वास्थ्य सुरक्षाका मापदण्डहरुको पालना गर्न आह्वान गरेको छ ।
समुदाय स्तरमा तपाईको मास्क खोई ? अभियान सञ्चालन गरिने र घरबाहिरबाट घर जाँदा सावुन पानीले हात हुने र धुन लगाउने लगायतका अभियान चलाइने गाउँपालिकाले जनाएको छ ।
त्यसेगरि २५ जना भन्दा बढी व्यक्तिहरु भेला हुने गरि कुनैपनि भेला तथा मेलाहरु गर्न रोक लगाउने, सार्वजनिक स्थानमा प्रवेश गर्दा खोप कार्डलाई अनिवार्य गर्ने र कोरोना विरुद्धको खोप लगाउनबाट छुटेका लक्षित समुहका नागरिकलाई खोपको व्यवस्था गरिएकाले खोपको सुनिश्चित गरिने जनाइएको छ ।
