पोखरेबगर । म्याग्दीको अन्नपूर्ण गाउँकार्यपालिका अन्तरगतको अनुगमन समितिको निश्क्रीयता र बेवास्ताका कारण उपभोक्ता समितिका पदाधीकारी मर्कामा परेका छन् ।
काम सकेको महिनौ सम्म अनुगमन समितिले स्थलगत निरिक्षण गर्न र प्रतिवेदन दिन ढिलाई गर्दा उपभोक्ता समिति, निर्माण ब्यवसायी र आपुर्तिकर्ताले समयमै भुक्तानी नपाएको गुनासो गरेका हुन् ।
उपाध्यक्ष केशमाया मगर नेतृत्वको अनुगमन समितिले स्थलगत निरिक्षण पछि गरेको सिफारिसको आधारमा प्राबिधिकले बिल बनाएर भुक्तानी प्रक्रिया अघि बढाउने ब्यवस्था छ । पटक–पटक बोलाउदाँ पनि अनुगमन समिति नआउँदा भुक्तानी रोकिएर मजदुर, आपुर्तिकर्तालाई ज्याला दिन समस्या भएको उपभोक्ता समितिका पदाधीकारीहरुले बताएका छन् ।
समितिमा वडा न. ६ का अध्यक्ष कृष्णप्रसाद बरुवाल, कार्यपालिका सदस्य बिष्णुकुमारी दमै, आत्म तुलाचन, थमबहादुर बिक, योजना शाखाका अधिकृत हरिकृष्ण आचार्य र प्राबिधिक शाखाका प्रमुख इञ्जिनियर इश्वरबहादुर भण्डारी सदस्य हुनुहुन्छ ।
आर्थिक वर्षको बिचमा प्रमुख प्रशासकीय परिवर्तन हुनु, योजनाहरु थपिनु र संसोधन हुनु, सरुवा भएर जाने र आउने प्रशासकीय अधिकृतले कार्यालयमा बसेर नियमित काम नगरेको, जम्बो अनुगमन समितिबीच समन्वय अभाव, टुक्रे योजना धेरै हुँदा कार्यान्वयनमा समस्या देखिएको छ ।
दरबन्दी अनुसार प्राबिधिक जनशक्ति नहुँदा एउटै प्राबिधिकलाई तीन वटा सम्म वडाका योजनाको जिम्मा लगाइएको छ । १, ७ र ८ नम्बर वडाका योजना बालकृष्ण पौडेल, २ र ४ को यामनारायण पौडेल, ३ को निश्चल चोखाल, ५, ६ नम्बर वडाका साथै ठेक्का मार्फत कार्यान्वयन हुने योजना रुचेन्द्र अधिकारीले हेर्नुहुन्छ ।
प्रमुख प्रशासकीय अधिकृत सुरण शर्मा पौडेलका अनुसार चालु आर्थिक वर्षमा खरिद जन्य ५१ वटा सहित २०५ वटा योजना तथा कार्यक्रमलाई बजेट बिनियोजन भएको छ । हालसम्म १३३ वटा योजना सम्झौता भएकोमा ४१ वटाले निर्माण सकेर अन्तिम किस्ता भुक्तानी लगेका छन् ।
९२ वटा योजना कार्यान्वयनको क्रममा छन् । आर्थिक वर्ष सकिन तीन महिना बाँकी हुँदा ७२ वटा सम्झौता हुन बाँकी छ । १५ लाख रुपैयाँ भन्दा बढी बजेट बिनियोजन भएका छ वटा योजना ठेक्का प्रक्रियाबाट कार्यान्वयन गरिएको छ ।
कुल ४५ करोड १४ लाख नौ हजार ६२० हजार रुपैयाँ बजेट बिनियोजन गरेको अन्नपूर्णले आइतबारसम्म ३७.०९ प्रतिशत अथवा १७ करोड ११ लाख २५ हजार साठी रुपैयाँ खर्च गरेको छ । चालुतर्फ २९ करोड ५७ लाख ७५ हजार ६२० रुपैयाँ बिनियोजन भएकोमा १३ करोड ६३ लाख ९० हजार ८२९ रुपैयाँ अथवा ४६.११ प्रतिशत खर्च भएको छ ।
पँुजिगत तर्फ १५ करोड ५६ लाख ३४ हजार रुपैयाँ बिनियोजन भएकोमा तीन करोड ४७ लाख ३४ हजार २३१ रुपैयाँ अथवा २२.३२ प्रतिशत खर्च भएको प्रमुख प्रशासकीय अधिकृत शर्माले बताउनुभयो । काम सकिएका आयोजनाका उपभोक्ता समितिलाई बोलाएर धमाधम भुक्तानी गरिरहेको उहाँले बताउनुभयो ।
केही दिनअघि कार्यालयको प्रशासनिक र आर्थिक काम ठप्प बनाएर मुस्ताङ घुम्न गएपछि अन्नपूर्णका कर्मचारी र जनप्रतिनिधीहरुको चर्को आलोचना भएको थियो । दवाव र गुनासो बढेपछि चारदिनका लागि भ्रमणमा गएका उनिहरु दोस्रो दिनमै मुक्तीनाथबाट पोखरेबगर फर्किनुका साथै खर्च समेत ब्यक्तिगत हिसाबले ब्यहोर्ने घोषणा गरेका थिए ।
उपाध्यक्ष मगरले प्रमुख प्रशासकीय अधिकृत आएपछि अनुगमन गरेर भुक्तानीका लागि सिफारिस गर्न तिब्रता दिएको बताउनुभयो । एउटा वडाका योजनालाई एकै पटक अनुगमन गर्ने योजना अनुसार आइतबार घोडेपानीबाट अनुगमन सुरु गरेको उपाध्यक्ष मगरले बताउनुभयो ।
गत असारको गाउँसभा र कार्यपालिका बैठकले गरेको बैशाख अघिनै पुर्बाधार योजना कार्यान्वयन सक्ने निर्णय कागजमै सिमिति बन्ने देखिएको छ । इञ्जिनियर इश्वर भण्डारीले चार जना प्राबिधिकले आठ वडा हेर्नुपर्ने र टुक्रे योजना धेरै भएकाले उपभोक्ता समितिले भन्दा बित्तिकै बिल बनाउन सक्ने अवस्था नरहेको बताउनुभयो ।
तर काम सकिएका योजनाहरुको सूचना पाउने बित्तिकै नापजाँच गरेर मूल्याङ्कन र बिल बनाउने गरेको उहाँले बताउनुभयो । प्राबिधिक शाखाबाट उपभोक्ता र निर्माण ब्यवसायीलाई अल्झाउने काम नभएको उहाँको दावी छ ।
