बेनी, म्याग्दीको अन्नपूर्ण गाउँपालिका–६ मा रहेको पर्यटकीय स्थल घोडेपानी जोड्ने सडकको लुलीया घुम्तिको सडक मर्मतका लागि आइतबारदेखि समुदाय स्तरबाट श्रमदान अभियान सञ्चालन भएको छ ।
पोखरेबगर–घोडेपानी सडकको लुलीयाघुम्तीमा दुर्घटना बढ्न थालेपछि स्थानीयबासीहरुले स्वसफुर्त रुपमा श्रमदान गरेर मर्मत थालेका हुन् । पोखरेबगर, कुरमुनी, हल्लेखर्क, बिरौटा, भुवानीथान र घारगाउँका ७८ जना आइतबार श्रमदानमा सहभागी भएका पोखरेबगर युवा क्लवका अध्यक्ष रामकृष्ण खड्काले जानकारी दिनुभयो ।
अन्नपूर्ण गाउँपालिकाले उपलब्ध गराएको जाली भरेर १३ घनमिटर पर्खाल निर्माण भएको र १५ मिटर दुरीमा ढुङ्गा बिछ्याएर सोलिङ भएको छ । थप कामका लागि सोमबार पनि श्रमदान अभियानलाई निरन्तरता दिइने क्लवका अध्यक्ष खड्काले बताउनुभयो । सडकको अन्य ठाउँमा नालीमा थुप्रिएको फोहोर हटाएर सफा गरिएको छ ।
अन्नपूर्ण गाउँपालिका–६ का वडा अध्यक्ष रामबहादुर खड्का, स्थानीय युवा राजाराम बरुवाल, बिपिन बरुवाल, रामकृष्ण खड्काको समन्वयमा सडक मर्मतका लागि श्रमदान अभियान सञ्चालन भएको हो । सडक मर्मतका लागि मुक्तिनाथ केबुलकार प्रा.ली.बाट रु. ५० हजार सहयोग प्राप्त भएको र यातायात ब्यवसायीहरुले पनि सहयोग गर्ने प्रतिवद्धता जनाएका छन् ।
लुलीयाघुम्ती र हल्लेखर्च पहिरो क्षेत्रमा सडकको जिर्ण अवस्थाका कारण स्थानीयबासीका साथै पर्यटकीय स्थल घोडेपानी भ्रमणमा जाने पर्यटकहरुलाई समस्या भएको छ । पहिरोका कारण साँघुरिएको, ग्रेड र मोड नमिलेको लुलीयाघुम्ती र हल्लेखर्क पहिरोमा सवारी साधन उक्लन नसक्ने, बिचैमा अड्कीने र दुर्घटना हुने समस्या बढेको छ ।
संघीय सरकारले बजेट बिनियोजन गरेको योजना कार्यान्वयनमा भएको ढिलाईका कारण जोखिम बढेपछि समुदाय स्तरमा श्रमदान गरेर अस्थायी रुपमा मर्मता थालिएको वडा अध्यक्ष रामबहादुर खड्काले बताउनुभयो ।
“लुलीयाघुम्ती, हल्लेखर्कको सडक सुधारका लागि स्थानीय पूर्वाधार विकास कार्यालय पोखराले योजना कार्यान्वयनमा गरेको ढिलाईले दुर्घटनाको जोखिम र सास्ती बढाएको छ,” उहाँले भन्नुभयो “जनप्रतिनिधीहरुबाट निरन्तर ताकेता भएपनि कार्यालयले बेवास्ता गर्दा दिर्घकालिन समाधानका लागि रु. तीन करोड बजेट बिनियोजन भएको योजना कार्यान्वयनमा अन्यौलता सिर्जना भएको छ ।”
घोडेपानीको वनपाखा लालीगुराँस फुलेर रंगिएको छ । कास्कीको बिरेठाटीतर्फबाट पनि घोडेपानी सडकले जोडिएको छ । बिरेठाँटी उल्लेरी हुदै घोडेपानी जोड्ने सडक नयाँ मार्ग खोलेको हुँदा भालेओडार क्षेत्रमा हिलोमा फस्ने समस्या छ । लालीगुराँसको जंगल, पुनहिलबाट हिमशृङखला अवलोकनका लागि सवारी साधन चढेर घोडेपानी जाने आन्तरिक पर्यटकको चाप छ ।
