बेनी, ः म्याग्दीबाट नवनिर्वाचित प्रतिनिधीसभा सदस्य महाविर पुनले अनुत्पादक क्षेत्रमा राज्यको लगानी रोक्न स्थानीय तहका जनप्रतिनिधीहरुलाई आग्रह गर्नुभएको छ ।
बेनी नगरपालिकाका जनप्रतिनिधीहरुसँग सोमबार बेनीमा भएको अन्तरक्रियाका क्रममा सांसद पुनले टोलै पिच्छे गेट (प्रवेशद्धार), भवन बनाएर अनुत्पादक क्षेत्रमा राज्यको बजेट खेर फाल्न नहुने बिचार व्यक्त गर्नुभयो ।
“गाउँ गाउँमा जाँदा धेरै ठाँउमा गेटहरु बनाएको देखे, देशका अरु ठाउँमा भ्यु टावर बनाएको पाए,” उहाँले प्रश्न गर्नुभयो “गेटको केही अर्थ छ ? गेटबाट छिरेर गाउँमा पसेपछि के रोग निको हुन्छ ? प्रकृतिले बनाएको अग्लो ठाउँ आफै भ्यु टावर हो । त्यहाँ भ्यु टावर बनाएर देखाउनलाई मात्र बजेट खर्च गर्न भएन् ।”
पूर्वाधार विकाससँगै रोजगारी सिर्जना हुने र गाउँमै आयआर्जन गर्न सक्ने वातावरण बनाउने कार्यक्रममा जोड दिन सांसद पुनले स्थानीय तहका जनप्रतिनिधीहरुलाई आग्रह गर्नुभयो । धवलागिरी, मालिका र मंगला गाउँपालिकाका जनप्रतिनिधीहरुसँग पालिकामा सञ्चालित र थप आवश्यक योजना तथा कार्यक्रमहरुको बारेमा छलफल गरेर पुन सोमबार बेनीमा आउनुभएको थियो ।
निर्वाचन आयोगले चुनावको सबै प्रक्रिया पुरा गरिनसकेकाले फुर्सदको समयमा जिल्लाका जनप्रतिनिधीहरुसँग भइरहेका कामको बारेमा बुझ्न, थप गर्न सकिने तथा आवश्यक योजनाहरुको विषयमा छलफल गर्न आएको सांसद पुनले बताउनुभयो ।
पुनलाई बेनी नगरपालिकाका प्रमुख सुरत केसी, उपप्रमुख ज्योती लामिछाने र प्रमुख प्रशासकीय अर्जुन शर्माले संघीय सरकारलाई माग गर्न छनौट भएका २२ वटा योजनाहरुको विवरण पेश गर्नुभएको थियो ।
सांसद पुनले प्रमुख जिल्ला अधिकारी रविन्द्र आचार्यसँग भेटेर मेलाजात्राका कारण विद्यालयको पठनपाठन प्रभावित भएको र स्थानीय तहको भवन निर्माणका लागि जग्गा प्राप्ति प्रक्रियामा भएको ढिलाइएका विषयमा चासो देखाउनुभएको छ ।
म्याग्दीको शिक्षामा सुधार ल्याउन, शान्ति सुरक्षा कायम गर्न र सामाजिक विकृति अन्त्यका लागि मेला कम गर्न र दिन घटाउने नियम बनाउन प्रजिअ आचार्यलाई निर्देशन दिनुभयो । गाउँबाट सदरमुकाम बेनीमा सेवा लिनका लागि आउने सर्वसाधारणहरुको सहजताका लागि बेनीमा सम्पर्क कार्यालय खोलेर दुई जना कर्मचारीको ब्यवस्था मिलाउने सांसद पुनले जानकारी दिनुभयो ।
म्याग्दी उद्योग वाणिज्य संघले आयोजना गरेको स्वागत तथा बधाई कार्यक्रममा सांसद पुनले पर्यटन सम्बन्धी योजनाका विषयमा छलफल गर्नुभयो । नेपाल पत्रकार महासंघको कार्यालयमा पुगेर सांसद पुनले पत्रकारहरुलाई समय अनुसार प्रबिधीलाई पछ्याएर पेशालाई अघि बढाउन सझाव दिनुभयो ।
