बेनी । यही फागुन २१ गते हुने प्रतिनिधिसभा सदस्य निर्वाचनलाई लक्षित गर्दै म्याग्दीमा गएरातिबाट मदिराजन्य पदार्थको बिक्रीवितरण पूर्ण रूपमा रोक लगाइएको छ । अन्तिम मत परिणाम सार्वजनिक नभएसम्म जिल्लाभर ‘ड्राइ डे’ लागू रहने प्रशासनले जनाएको छ ।
जिल्ला प्रशासन कार्यालय म्याग्दीले सूचना जारी गर्दै मदिरा बिक्री, ओसारपसार तथा सेवनमा प्रतिबन्ध लगाइएको जानकारी दिएको हो । स्वच्छ, निष्पक्ष, शान्तिपूर्ण र भयरहित वातावरणमा निर्वाचन सम्पन्न गराउने उद्देश्यले यस्तो निर्णय गरिएको सहायक प्रमुख जिल्ला अधिकारी कुलप्रसाद आचार्यले बताउनुभयो ।
निर्वाचन सुरक्षा (व्यवस्थापन) निर्देशिका, २०७८, निर्वाचन आयोगको परिपत्र तथा जिल्ला सुरक्षा समितिको निर्णयका आधारमा प्रतिबन्ध लागू गरिएको सहायक प्रजिअ सुवेदीको थियो । निर्वाचन अवधिभर शान्ति सुरक्षा र सामाजिक सद्भाव कायम राख्न होटल तथा मदिरा व्यवसायी, राजनीतिक दल, उम्मेदवार र सर्वसाधारण सबैलाई सहयोग गर्न आग्रह गरिएको छ ।
सूचनाको कार्यान्वयनका लागि सुरक्षा निकायबाट निगरानी बढाइने र उल्लङ्घन गर्ने उपर प्रचलित कानुनअनुसार कारबाही गरिने चेतावनी समेत दिइएको छ ।
