बेनी ः म्याग्दीको मंगला गाउँपालिका–२ सल्यानमा शनिबार माटोको ढिस्कोले पुरिएका तीन जना मजदुरको उद्धार गरिएको छ ।
बाबियाचौर–सल्यान सडकको ग्यावीयन पर्खाल लगाउने क्रममा ढिस्को खसेर पुरिएका उनिहरुलाई स्थानीयबासी र सुरक्षाकर्मीहरुले डोजर परिचालन गरेर तत्कालै उद्धार गरेका हुन् ।
रोल्पाको सुनछहरी गाउँपालिका–२ का टेकबिर बुढामगर, सतबहादुर बुढामगर र केशमान बुढामगरलाई उद्धार गरि उपचारका लागि प्रदेश अस्पताल बेनीमा ल्याइएको जिल्ला प्रहरी कार्यालयले जनाएको छ ।
प्रदेश अस्पताल बेनीमा उपचाररत मजदुरहरु खतरामुक्त रहेका छन् । दिउँसो १ बजेको समयमा काम गरिरहेको अवस्थामा एक्कासी माटोको ढिस्को खसेर उनिहरुलाई पुरेको थियो ।
इलाका प्रहरी कार्यालय दरवाङका प्रहरी निरीक्षक रनिन्द्र कार्की र बाबियाचौर प्रहरी चौकीका प्रहरी सहायक निरीक्षक सुमन थापाको नेतृत्वको २२ जना सुरक्षाकर्मी तथा स्थानीयबासीहरुले डोजरको सहायताले माटो पन्छाएर मजदुरको उद्दार गरेका थिए ।
