बेनी, जिल्ला प्रहरी कार्यालय म्याग्दीले इजाजत नभएका एक सय १५ थान भरुवा बन्दुक बरामद गरेको छ ।
आसन्न प्रतिनिधीसभा सदस्य निर्वाचनको सुरक्षा, बन्यजन्तुको अवैध चोरी शिकारी र अपराध नियन्त्रणका लागि मंसिर १५ गतेदेखि शुरु भएको ‘ब्राबोसेरा’ अभियान मार्फत एक महिनामा उक्त परिणाममा बन्दुक बरामद भएको हो ।
बरामद भएका सबै बन्दुकहरु स्थानीय घरेलु प्रबिधीबाट निर्माण भएका र इजाजत नभएका रहेका प्रहरी नायव उपरीक्षक सुर्यबहादुर थापाले जानकारी दिनुभयो । “बरामद भएका धेरैजसो बन्दुक चालु अवस्थामा छन्,” उहाँले भन्नुभयो “ढोरपाटन शिकार आरक्ष, अन्नपूर्ण संरक्षण क्षेत्र आयोजना र सामुदायिक वनहरुमा वन्यजन्तुको चोरी शिकारीका साथै आपसी बिवाद र झैझगडामा समेत प्रयोग हुने जोखिम भएकाले अबैध बन्दुक बरामद गर्ने अभियान चलाएका हौ ।”
अबैध बन्दुक बरामद गर्न सञ्चालन भएको अभियानलाई म्याग्दी प्रहरीले ब्राबोसेरा नाम दिएको छ । स्थानीयबासीहरुको सूचना तथा सहयोग समेतमा जंगल, रुखका टोड्का, खोल्सा, मासिन नबस्ने घर गोठ तथा जमिनमा गाडेको अवस्थामा बन्दुक बरामद गरिएको प्रहरी निरिक्षक सागर तिमिल्सीनाले बताउनुभयो ।
रघुगंगा गाउँपालिकाबाट ४८ थान, मालिकामा २० थान, मंगलामा १४, अन्नपूर्णमा १६, धवलागिरीमा छ र बेनी नगरपालिकामा ११ थान बन्दुक बरामद भएको छ । फागुन २१ गते हुन लागेको प्रतिनिधीसभा सदस्य निर्वाचनका लागि तय भएको एकिकृत जिल्ला सुरक्षा योजना अनुसार जिल्ला प्रशासन कार्यालय, म्याग्दीले इजाजत भएका हातहतियारहरु पनि बुझाउन सूचना जारी गरिसकेको छ ।
प्रशासनबाट अनुमति लिएर व्यक्तिगत सुरक्षाको प्रयोजनका लागि हतियार राख्न पाउने ब्यवस्था छ । प्रशासनबाट इजाजत नलिई हातहतियार राख्नेलाई पाँच वर्षसम्म कैद सजाय र रु. पचास हजारसम्म जरिवाना हुने कानुनी ब्यवस्था छ ।
अबैध बन्दुक बरामद गर्ने अभियान जारी राख्ने र त्यस्ता बन्दुक भएको सूचना उपलब्ध गराउन म्याग्दी प्रहरीले अनुरोध गरेको छ ।
