बेनी। बेनी सामुदायिक माविका निवर्तमान प्रअ दिपक श्रेष्ठको बिहिबार नागरिक अभिनन्दन सहित विदाई गरिएको छ ।
बेनी सामुदायिक माविको व्यवस्थापन समिति, शिक्षक अभिभावक संघ, शिक्षक, विद्यार्थी, पुर्व विद्यार्थी र अभिभावकहरुले श्रेष्ठलाई बाजागाजासहित बजार परिक्रमा गराएर अभिनन्दन गरेर बिदाइ गरेका हुन् ।
बिहीबार विद्यालयले आयोजना गरेको बिदाई कार्यक्रममा नौमती बाजासहित शिक्षक, अभिभावक र विद्यार्थीले श्रेष्ठलाई गाडीमा राखेर बजार परिक्रमा गराएका थिए । बजार परिक्रमा क्रममा बजारवासीले शिक्षक श्रेष्ठलाई फूलमाला, अविर र खाँदा लगाएर नागरिक अभिनन्दन समेत गरे ।
२०६७ देखि २०६९ सम्म प्राचार्य र २०६९ देखि २०८२ मङिसर १७ सम्म प्रधानाध्यापक भई विद्यालयको शैक्षिक विकासमा योगदान गरेकाले श्रेष्ठलाई सम्मान पूर्वक र नागरिक अभिनन्दन सहित बिदाई गरिएको व्यवस्थापन समितिका अध्यक्ष रमेश श्रेष्ठले बताउनुभयो ।
बिदाइ कार्यक्रममा बजारवासीको समेत सहभागिता रहेको थियो । विद्यालयले गाडीमा चढाएर बाजागाजासहित बेनी नगरपालिका ८ स्थित संगमचोकमा रहेको श्रेष्ठको घरमा पु¥याइएको छ ।
नेपाल सरकार शिक्षा मन्त्रालयले २०७० सालमा नेपालकै सर्वोत्कृष्ट सामुदायिक विद्यालय घोषित गरेको बेनी सामुदायिक मावि देशभरका विद्यालयहरुको लागि अध्ययन र भ्रमण गर्ने थलोका रुपमा विकास भएको छ ।
२०११ सालबाट अस्थायी रूपमा सञ्चालित विद्यालयले २०३३ सालमा सरकारबाट मान्यता प्राप्त गरेको थियो। २०६३ सालदेखि माध्यमिक तहको परीक्षामा सहभागिता जनाएको विद्यालयले हरेक वर्ष सामुदायिक विद्यालयमा उत्कृष्ट नतिजा ल्याउने गरेको छ ।
