बेनी । म्याग्दीको धवलागिरी गाउँपालिका–५ मल्कवाङमा शनिबार पहिलो पटक बस पुगेको छ ।
जिल्ला सदरमुकाम बेनी बजारदेखि यात्रु बोकेर पहिलो पटक मल्कवाङ पुगेको ध १ ख ३०८ नम्बरको बसका धनी जगत दगामी मगर र चालक श्याम मिजारले स्थानीयबासीले अबिर र माला लगाएर स्वागत गरेका छन् ।
धवलागिरी गाउँपालिका–५ मल्कवाङका वडा अध्यक्ष अमर छन्त्याल लगायत जनप्रतिनिधी, स्थानीय अगुवा, आमा समूह र युवा क्लवका प्रतिनिधीहरुले बस चालक र सवारी धनीलाई स्वागत गर्नुका साथै खुसीयाली मनाएका हुन् ।
“वि.स. २०७८ मा सडक सञ्जालमा जोडिएको मल्कवाङमा यसअघि जिप, ट्याक्टर र मोटरसाइकल मात्र आउने गरेका थिए,” वडा अध्यक्ष छन्त्यालले भन्नुभयो “गाउँपालिका मार्फत बर्खामा अवरुद्ध सडक मर्मत गर्ने क्रममा अप्ठ्यारो ठाउँमा ग्रेड र घुम्ती मिलाएर बस चल्ने बनाइएको हो ।”
सडक सञ्जालमा जोडिएको पाँच वर्षपछि मल्कवाङमा बस सञ्चालन हुन थालेको हो । बस सञ्चालन भएपछि स्थानीयबासीहरुले जिपको तुलनामा सस्तो भाडादरमा यात्रा गर्न पाएका छन् । यसअघि जिपमा मल्कवाङ–बेनी यात्रा गर्दा प्रति व्यक्ति रु. एक हजार भाडा तिर्नुपरेको थियो ।
बसका लागि प्रतिव्यक्ति भाडादर रु. सात सय ५० कायम भएको छ । बेनी देखि मल्कवाङ सम्मको दुरी ४५ किलोमिटर छ । मल्कवाङ, भेडिखाल्डा, कुइनेखानी, आरवाङ, घण्टीवाङका तीन सय भन्दा बढी घरपरिवार लाभान्वित भएका छन् ।
बर्खाको असार देखि असोज महिना बाहेक आठ महिना बस सञ्चालन गर्न मिल्ने गरेर सडक बनाएको वडा अध्यक्ष छन्त्यालले बताउनुभयो । म्याग्दी यातायात प्रा.ली.ले बेनी देखि हरेक बिहान ७ बजे र मल्कवाङ देअि बिहान ८ बजे प्रत्येक दिन एक÷एक वटा बस छुटाउने भएको छ ।
यसअघि मल्कवाङ, भेडिखाल्टा, आरवाङ, घण्टीवाङ, कुइनेखानीका बासिन्दा पैदलयात्रा गरेर मराङ बेशी पुगेर बस चढ्ने गरेका थिए । मल्कवाङ देखि भेडीखाल्टालाई सडक सञ्जालमा जोड्न धवलागिरी गाउँपालिकाले चालु आर्थिक वर्षको योजना कार्यान्वयनको तयारी गरेको गाउँपालिकाका अध्यक्ष प्रेमप्रसाद पुनले बताउनुभयो ।
मल्कवाङ देखि भेडिखाल्टा जोड्ने सडक निर्माणका लागि गाउँपालिकाबाट यस वर्ष रु. ३० लाख बिनियोजन भएको छ । भेडिखाल्टामा पनि हालसम्म सडक पुगेको छैन् ।
गण्डकी प्रदेश सरकारले मालिका गाउँपालिकाको बिमलुरवाङ, मराङबेशी, अर्वाङ हुदै मल्कवाङ जोड्ने सडक स्तरोन्नतिका लागि बहुबर्षीय योजना सञ्चालन गर्ने लक्ष्य सहित चालु आर्थिक वर्षमा रु. एक करोड बिनियोजन गरेको छ ।
प्रदेशसभा सदस्य रेशम जुग्जालीले उक्त बजेटलाई २० प्रतिशत मानेर रु. पाँच करोड स्रोत सुनिश्चितता गराई बहुबर्षीय ठेक्का आव्हान गर्ने र लुरवाङ देखि मल्कवाङ खण्डको अप्ठ्यारो, अप्ठ्यारो ठाउँको सडकलाई स्तरोन्नति गरेर सहज बनाउन पहल गरेको जानकारी दिनुभयो ।
