बेनी ः मालिका गाउँपालिका–६ दरवाङमा रहेको केवी एकेडेमी बेनीमा शनिबार सम्पन्न २३ औ अन्तर मा.वि. जेसिजकप फुटवल प्रतियोगिताको च्याम्पीयन (बिजेता) बनेको छ ।
म्याग्दी जेसीजको आयोजनामा चार दिनसम्म बेनीको खुल्ला मञ्च खेलमैदानमा सञ्चालित प्रतियोगिताको फाइनलमा बेनी सामुदायिक माविलाई एकका विरुद्ध तीन गोल गर्दै केवी बिजयी भएको हो ।
बिजेताले ट्रफी, मेडल, प्रमाणपत्र सहित नगद रु. ५५ हजार पाँच सय ५५ पुरस्कार हात पारेको छ । उपबिजेताले ट्रफि, मेडल र प्रमाणपत्र सहित नगद रु. ३५ हजार पाँच सय ३५ पुरस्कार प्राप्त गरेका म्याग्दी जेसीजका कोषाध्यक्ष तथा प्रतियोगिता संयोजक नविन पौडेलले जानकारी दिनुभयो ।
१९ वटा विद्यालयले सहभागिता जनाएको प्रतियोगिताका बिजयी खेलाडीहरुलाई गण्डकी प्रदेशसभा सदस्य हरिबहादुर भण्डारी, जेसीजका शाखा अध्यक्ष बिनोद जिसी लगायतले पुरस्कार वितरण गर्नुभएको थियो ।
केवीकाहोमन जुग्जाली उत्कृष्ट खेलाडी, सज्जन घर्ती गोलरक्षक, दण्डीन लामा कोच, मौसम रोका मिडफिल्डर, बेनी सामुदायिकका साइरेश पुनले डिफेण्डर र लिटल गार्डेनका इसान सुवेदीले राइजीङ प्लेयरको उपाधी पाउनुभयो ।
प्रतियोगिता अवधीभर पाँच÷पाँच गोल गरेका केवीका खिमबहादुर थापा, माउन्टका एञ्जल थजाली र लिटलका एलिन जुग्जालीले सर्वाधिक गोलकर्ताको पुरस्कार प्राप्त गरे । उनिहरुलाई नगद रु. दुई हजार पाँच सयको साथमा ट्रफी प्रदान गरिएको थियो ।
अनुशासित टिम निस्कोट मावि, सेमिफाइनलबाट बाहिरिएका लिटल गार्डेन र किसानी चन्द्रकुन्ता माविले नगद रु. पाँच हजार सहित ट्रफी पाए । कक्षा १० सम्मका विद्यार्थीहरुले सहभागीता जनाउने जेसीज कप फुटवल म्याग्दीमा विद्यालय तहमा प्रतिस्पर्धा हुने लोकप्रिय छ ।
पहिलो हाफको २२ औ मिनेटमा बिबेक बुढाको प्रहारबाट पहिलो गोल गर्न सफल भएको केबी एकेडेमीका खेलाडी फाइनलको दोस्रो हाफमा पनि बेनी सामुदायिकमाथि हाबी भएका थिए । दोस्रो हाफको ३८ औ र ४३ औ मिनेटमा केबीका दिक्षित पुनले दुई गोल गरेर अग्रता दिएका थिए ।
सामुदायिकका टिम क्याप्टेन सन्दिप क्षेत्रीले खेलको अन्तिम समयमा एक गोल गरेका थिए । केवी एकेडेमीले पहिलो पटक जेसीजकप जितेको हो भने बेनी सामुदायिकले लगातार दोस्रो बर्ष उपबिजेतामा चित्त बुझाएको छ ।
