मल्लाज, ः पर्वतको जलजला गाउँपालिका अन्तरगतका विद्यालय स्तरीय चौथो राष्ट्रपति रनिङ्ग शिल्ड खेलकुद प्रतियोगितामा वारीबेनीमा रहेको न्यु होराइजन आवासीय मावि च्याम्पीयन (बिजयी) भएको छ ।
मङसिर १० देखि १२ गतेसम्म मल्लाजको विद्याज्योती मावि परिसरमा सञ्चालन भएको प्रतियोगितामा सहभागी अन्य १४ विद्यालयलाई पछाडी पार्दै न्यु होराइजनले उपाधी जितेको हो ।
बिजेता न्यु होराइजनले आठ स्वर्ण, तीन रजत र एक कास्य पदक जितेको जलजला गाउँपालिकाको शिक्षा, युवा तथा खेलकुद शाखाका प्रमुख देवी रिजालले जानकारी दिनुभयो । उपबिजेता विद्याज्येती माविले पाँच स्वर्ण, छ रजत र तीन कास्य पदक जितेको छ ।
तृतीय भएको अमृत आदर्श प्याराडाइज एकेडेमीले दुई स्वर्ण, चार रजत र चार कास्य पदक जितेको छ । १५ वटा विद्यालयले सहभागिता जनाएको प्रतियोगितामा भलिबल, एथलेटिक्स र कवड्डी खेलका ३० वटा बिधामा प्रतिस्पर्धा भएको थियो ।
प्रतियोगितामा बिजेताले रनिङ्ग शिल्ड, ट्रफी, मेडल र प्रमाणपत्र सहित नगद रु. ५० हजार प्राप्त गरेको छ । उपबिजेता र तृतीय हुनेले ट्रफी, मेडल र प्रमाणपत्र सहित नगद रु. ३० हजार र २० हजार पाउनेछन् । उद्घाटनका अवसरमा भएको मार्चपासमा बनौ मावि प्रथम भएको थियो ।
प्रतियोगितामा बिजेता खेलाडीहरुलाई जलजला गाउँपालिकाका अध्यक्ष राजुप्रसाद आचार्य, वडा अध्यक्ष भरत जिसी, तिलक जिसी लगायतले पुरस्कार वितरण गर्नुभएको थियो । विद्यालय स्तरका खेल प्रतिभाको पहिचान र उनिहरुको प्रोत्साहनका लागि प्रतियोगिता आयोजना गरिएको गाउँपालिकाले जनाएको छ । पालिका स्तरमा उत्कृष्ट खेलाडी छनौट गरेर जिल्ला स्तरीय प्रतियोगितामा सहभागी गराइने भएको छ ।
