म्याग्दी ः जिल्ला प्रशासन कार्यालय म्याग्दीले ‘विद्यार्थीसँग प्रजिअ’ कार्यक्रम शुरु गरेको छ ।
प्रशासनले गर्ने काम, प्रवाह गर्ने सेवा सुविधा र प्रक्रीयाका बारेमा जानकारी गराउन विद्यालय क्याम्पस तहमा अध्ययन गर्ने युवा विद्यार्थी लक्षित कार्यक्रम सञ्चालन गरेको हो । विद्यार्थी मार्फत समुदाय सम्म प्रशासनका काम कारबाहीको बारेमा जानकारी दिने, आम नागरिकको प्रशासनिक सेवामा पहुँच बढाउने, गुनासो, सल्लाह र सुझाव लिने उद्देश्यले कार्यक्रम सञ्चालन गरिएको प्रमुख जिल्ला अधिकारी बद्रीप्रसाद तिवारीले जानकारी दिनुभयो ।
“राज्य र नागरिक एक रथका दुई पाङग्रा हुन भन्ने अवधारणा अनुसार विशेष गरेर युवा, विद्यार्थी मार्फत प्रशासनलाई समाजसँग जोड्ने उद्देश्य हो,” उहाँले भन्नुभयो “सार्वजनिक सेवा प्रवाहमा सहजिकरण गरेर सरल र सहज बनाउने प्रयास स्वरुप युवा, विद्यार्थीलाई जानकारी गराउने तथा उनिहरुका पनि सल्लाह, सुझाव र अपेक्षा संकलन गर्न थालेका हौ ।”
कार्यक्रम मार्फत हरेक महिनाको एक दिन प्रमुख जिल्ला अधिकारीले म्याग्दीका विद्यालय तथा क्याम्पस तहका विद्यार्थीसँग भेटघाट, अन्तरक्रिया र अभिमुखीकरण गरिने भएको छ । सदरमुकामका क्याम्पस विद्यालयका विद्यार्थीलाई प्रशासनमै बोलाउने र सदरमुकाम बाहिरका विद्यालयमा प्रमुख जिल्ला अधिकारी आफै पुग्ने जनाइएको छ ।
अन्तरक्रियाका क्रममा जिल्ला प्रशासन कार्यालयको परिचय, काम, प्रवाह गर्ने सेवा, शान्ति सुरक्षा, विकास निर्माण, सार्वजनिक सम्पत्तीको संरक्षण लगायत विषयमा विद्यार्थीहरुलाई जानकारी गराइनेछ । शुक्रबार पहिलो पटक बेनी सामुदायिक माविका विद्यार्थीहरु प्रशासन कार्यालयमा आएर कार्यकक्षहरुको अवलोकन, प्रमुख जिल्ला अधिकारी र कर्मचारीहरुसँग अन्तरक्रिया गरेका थिए ।
विद्यार्थीहरुलाई प्रजिअ तिवारी लगायत कर्मचारीहरुले फुल दिएर कार्यालयमा स्वागत गरेका थिए । जिल्ला प्रशासन कार्यालय, म्याग्दीले पछिल्लो समय सेवा प्रवाहमा सरलीकरण गरेको छ । कार्यालयमा प्रशासनकै कर्मचारीबाट निवेदन तयार पार्ने ब्यवस्था मिलाएर रकम तिरेर तेस्रो व्यक्तिको सहयोग लिनुपर्ने अवस्थाको अन्त्य गरेको सहायक प्रमुख जिल्ला अधिकारी कुलराज आचार्यले बताउनुभयो ।
युवा पुस्ताका सेवाग्राहीहरुलाई लक्षित गरेर ‘जेनजी सुझाव पेटिका’ राखेको छ । प्रशासनमा सेनेटरी प्याड र प्राथमिक उपचार सामग्रीको बाकस राखिएको छ । कर्मचारी परिचालन गरेर मासिक रुपमा सबै कार्यालयहरु सरसफाई गर्ने गत हप्ताको कार्यालय प्रमुख बैठकको निर्णय कार्यान्वयन भएको छ ।
