बेनी, १२ मंसिर । बेनी सामुदायिक मावि र केवी एकेडेमी दरवाङ बेनीमा जारी २३ औ अन्तर मा.वि. जेसिजकप फुटवल प्रतियोगिताको फाइनलमा पुगेका छन् ।
बेनीको खुल्लामञ्च खेलमैदानमा शुक्रबार भएको सेमी फाइनलमा बेनी सामुदायिकले किसानी चन्द्रकुन्ता मावि धारापानी र केवी एकेडेमीले लिटल गार्डेन एकेडेमी बेनीलाई पराजित गर्दै फाइनल प्रवेश गरेका हुन् ।
बेनी सामुदायिकले किसानी चन्द्रकुन्तालाई शून्य–दुई गोल अन्तरले पराजित गरेको हो । केबी र लिटल गार्डेनबीच भएको खेलको निर्धारित समयमा एक÷एक गोल भएपछि पेनाल्टी सुटआउट भएको थियो । पेनाल्टीमा लिटलले दुई र केवीले चार गोल गरेका थिए ।
शनिबार १२ बजे फाइनल खेल सुरु हुने र त्यसअघि मैत्रीपूर्ण प्रतियोगिता हुने म्याग्दी जेसीजका कोषाध्यक्ष तथा प्रतियोगिता संयोजक नविन पौडेलले जानकारी दिनुभयो । मंसिर ९ गतेदेखि शुरु भएको प्रतियोगितामा १९ वटा विद्यालयले सहभागिता जनाएका थिए ।
बिजेताले ट्रफी, मेडल, प्रमाणपत्र सहित नगद रु. ५५ हजार पाँच सय ५५ पुरस्कार प्राप्त गर्ने म्याग्दी जेसीजका अध्यक्ष बिनोद जिसीले बताउनुभयो । उपबिजेताले ट्रफि, मेडल र प्रमाणपत्र सहित नगद रु ३५ हजार पाँच सय ३५ पुरस्कार प्राप्त गर्ने जनाइएको छ ।
प्रतियोगितामा उत्कृष्ट खेलाडी, सर्वाधिक गोलकर्ता, उत्कृष्ट गोलरक्षक, उत्कृष्ट स्ट्राइकर, उत्कृष्ट डिफेन्डर, उत्कृष्ट मिडफिल्डर, राइजीङ प्लेयर, उत्कृष्ट प्रशिक्षकलाई नगद रु. दुई हजार पाँच सयसहित ट्रफिद्धारा पुरस्कृत गरिने छ ।
त्यस्तै, अनुसासित टिम र सेमिफाइनल पुग्ने दुई टिमलाई नगद रु ५ हजार सहित सहित सम्मान गरिने छ । प्रतियोगिता सञ्चालनको लागि एभरेष्ट ग्लोबल एजुकेसन भिसा सर्भिस मुख्य प्रायोजक रहेको छ भने गंगा जिसी फाउण्डेसन र प्रभु बैँक सहप्रायोजकको रुपमा रहेका म्याग्दी जेसिजका शाखा अध्यक्ष विनोद जिसीले बताउनुभयो ।
कक्षा १० सम्मका विद्यार्थीहरुले सहभागीता जनाउने जेसीज कप फुटवल म्याग्दीमा विद्यालय तहमा प्रतिस्पर्धा हुने लोकप्रिय छ ।
