बेनी, मुस्ताङको कोरला नाकाबाट नेपाल र चीनबीचको व्यापारिक गतिविधि सुरु भएपछि गण्डकी र लुम्बीनी प्रदेशमा व्यवसायको नयाँ अवसर सिर्जना भएको छ ।
तातोपानी र रसुवा नाका अवरूद्ध भएपछि नेपाली ब्यापारीहरुले कोराला नाकाबाट मुस्ताङ, म्याग्दी हुदै राजधानी काठमाडौमा चिनीया सामग्री आयात, निर्यात गर्न थालेका हुन् । वि.स. २०८० कात्तिक २७ गतेदेखि उपल्लो मुस्ताङका बासिन्दाका लागि मात्र सञ्चालन भएको कोरला नाका दुई वर्षपछि ब्यापारिक रुपमा सञ्चालन हुन थालेको हो ।
भारत र चिनको सामान आयात निर्यातका साथै नेपालमा उत्पादन भएको सामान बजारीकरणका लागि कालीगण्डकी कोरिडोर र कोरला नाकाले धौलागिरि क्षेत्रमा ब्यापार ब्यवसायको नयाँ अवसर सिर्जना गरेको म्याग्दी उद्योग वाणिज्य संघका अध्यक्ष सुविन श्रेष्ठले बताउनुभयो ।
बेनी, जोमसोम हुदै कोरला नाकामा करिब तीन सय कन्टेनर पुगेका र थप एक हजार पाँच सय कन्टेनर दसैको सामान लिन कोरला जाने क्रममा रहेका उहाँले बताउनुभयो । “कोरला नाका सञ्चालन हुन थालेपछि मुस्ताङ, म्याग्दी, बागलुङ, पर्वत र कास्कीका ब्यवसायीहरु उत्साही भएका छौ,” उहाँले भन्नुभयो “गण्डकी र लुम्बीनी प्रदेशका लागि कोरलाबाट सामान ल्याउँदा सस्तो पर्छ ।”
कोरला नाकामा रहेको भन्सार कार्यालयका अधिकृत रमेश खड्काले दशैका लागि नेपाली ब्यापारीले चिनमा किनेका सामानहरु बोकेका कन्टेनरहरु रसुवा र तातोपानी नाका बन्द भएपछि डाइभर्ट भएर कोरलामा आएका बताउनुभयो ।
समुन्द्रि सतहदेखि चार हजार सात सय मिटर उचाईमा रहेको कोरला नाकामा प्रदेश सरकारले गत बर्ष बनाएको भवनमा पूर्वाधार निर्माण, इन्टरनेट र विद्युत जडान गरेर भन्सार सञ्चालन गरिएको प्रमुख खड्काले बताउनुभयो । चिनबाट एक सय ५१ वटा विद्युतीय गाडी पनि आयात भएको छ ।
नेपालबाट मुर्ती, कपडा र बाँसका मुढा चिन निकासी भएको छ । दसैका लागि कपडाजन्य सामान बोकेका ५५ वटा चिनीया कन्टेनर कोरला नाकामा आएका छन् । थप कन्टेनर आउने क्रम जारी छ ।
कोरलामा सामान लिन जाने र सामान लिएर आउने कन्टेनरहरुको स्तरोन्नतिको क्रममा रहेको बेनी–जोमसोम–कोरला सडकको म्याग्दी खण्डमा सहज आवत जावतको ब्यवस्थाका लागि स्थानीय प्रशासन र कालीगण्डकी कोरिडोर सडक योजना कार्यालयसँग समन्वय गरेको अध्यक्ष श्रेष्ठले बताउनुभयो ।
रसुवा नाका गत असार २४ गतेदेखि बाढी र पहिरोले गर्दा बन्द भएको छ । सिन्धुपाल्चोकको कोदारीमा सडक मर्मतमा ढिलाई हुँदा तातोपानी नाका हुँदै चीनबाट नेपालतर्फ आउने सामान करिब ४६ दिनदेखि रोकिएको छ । दसैंको मुखमा कच्चा पदार्थ र तयारी सामान नपाउँदा समस्यामा परेका उद्योगी र व्यापारीहरूलाई कोरला नाका सञ्चालन भएपछि राहत मिलेको छ ।
