बेनी । म्याग्दीको बेनी नगरपालिका–४ सिंगाका किसानले उत्पादन गर्ने गाईको दूध पोखराको सुजल डेरी उद्योगले खरिद गर्ने भएको छ ।
दैनिक पाँच देखि १० हजार लिटर दूध उद्योगले खरिद गर्ने सञ्चालकले प्रतिवद्धता जनाएका बेनी नगरपालिका ४ का वडा अध्यक्ष अणबहादुर खड्का (भगवान)ले जानकारी दिनुभयो ।
“चुनावको समयमा किसानहरुसँग जनाएको प्रतिवद्धता अनुसार डेरी उद्योग सञ्चालकलाई ल्याएर शुक्रबार कृषकहरुसँग पहिलो चरणको छलफल गराएका छौ,” उहाँले भन्नुभयो “डेरी उद्योगले दूधको गुणस्तर अनुसारको मूल्य दिने र दैनिक दश हजार सम्म दूध खरिद गरिदिने भएको छ ।”
सिंगाको शुभकामना कृषि सहकारी संस्थाले बेनीमा ल्याउने बाहेक थप दूध उत्पादन गरेर पोखरा पठाउन गाईपालन व्यवसाय विस्तारमा जोड दिने वडा अध्यक्ष खड्काले बताउनुभयो । हाल बेनीमा भैसीको दूध खपत हुने गरेको छ । पातलो हुने भएकाले बेनीमा गाईको दूधको खपत कम छ ।
खपत कम हुने भएकाले कृषकहरुलाई दूध धेरै दिने उत्नत जातको गाईपालन विस्तार गर्न सकेका छैनन् । यसैगरी बेनीमा खपत नहुने दूधलाई पनि पोखरामा खपत गराउन सकिने भएको छ । दूधको बजार सुनिश्चित भएपछि सिंगामा दूध उत्पादन मार्फत आयआर्जन र रोजगारीको अवसर सिर्जना गर्ने वातावरण बनाउन सकिने वडा अध्यक्ष खड्काले बताउनुभयो ।
