बेनी, ः बेनी नगरपालिका–२ मा रहेको कोप्रे झरना गर्मी छल्ने थलोका रुपमा विकास भएको छ । गर्मीयाममा सितलताको खोजी गर्दै बेनीका बासिन्दाहरु कोप्रे झरनामा पुग्न थालेका हुन् ।
केही वर्षअघि सम्म गुमनाम कोप्रे झरना पछिल्लो समय नयाँ पर्यटकीय गन्तब्यको रुपमा विकास भएको छ । बेनी बजारदेखि दुई किलोमिटर पश्चिममा म्याग्दी नदीको किनार र अग्लो पहाडको फेदीमा कोप्रे झरना अवस्थित छ । सार्वजनिक बिदाका दिन बेनीका युवायुवति, किशोर किशोरी देखि प्रौद्धहरु कोप्रे झरनामा पुगेर रमाउने गर्छन् ।
शान्त र एकान्त वातावरणमा छङछङ गर्दै झर्ने झरनाको फेदीमा बसेर रमाइलो महशुस गर्न पाइने कोप्रे झरना घुम्न गएकी बेनीकी प्रिती छन्त्यालले अनुभव सुनाउनुभयो । “व्यस्त दैनिकी र सहरको कोलाहलबाट टाढा भएर प्रकृतिसँग रमाउँदा आनन्द महशुस भयो,” उहाँले भन्नुभयो “बेनीको उखरमाउलो गर्मी छल्न कोप्रे झरना उपयुक्त साहरा बनेको छ ।”
हिउँदमा सानो हुने कोप्रे झरना बर्खामा ठूलो हुने गर्दछ । भीर तथा पहराको सहारा लिएर लडीबुडी खेल्दै खस्ने झरना हेर्दा निकै मनमोहक, आकर्षक र सुन्दर देखिन्छ । करिब एक सय ५० मिटर अग्लो झरनाको फेदीबाट नजिकै अवलोकन गर्न सकिन्छ ।
घाम लागेको समयमा इन्द्रेणी पार्ने यस झरनाले पर्यटकलाई खुब लोभ्याइरहन्छ । पहाडको टुप्पोबाट जमिनतिर एकनासले खसिरहने झरनाको चिसो पानीमा भिज्न पाउँदा निकै आनन्द हुने बेनीका आनन्द पुनले बताउनुभयो । कोप्रे झरनामा भिडियो र तस्विर खिचेर सामाजिक सञ्जालमा टिकटक, रिल्स र स्टोरी बनाउने गर्छन् ।
बर्खायाममा कोप्रे झरनामा दिनभरजसो चहलपहल हुने बेनी नगरपालिका–२ का बासिन्दा नारायणबहादुर कार्कीले बताउनुभयो । कार्कीले झरना परिसरमा व्यक्तिगत लगानीमा चौतारी बनाएर बर र पिललको रुख रोप्नुभएको छ ।
बेनी नगरपालिकाले रु.दुई लाख ५० हजार खर्चेर आश्रयस्थल, पार्किङस्थल र बस्नका लागि फलामको बेञ्च राखेको छ । थप पूर्वाधार निर्माणका लागि चालु आर्थिक वर्षमा रु. दुई लाख बिनियोजन गरेको नगर प्रमुख सुरत केसीले बताउनुभयो ।
गण्डकी प्रदेश सरकार मार्फत बेनीको हाडेभिर देखि बगरफाँट कोप्रे झरनाको नजिकै दूधेखोला हुदै भकिम्ली जोड्ने सडक स्तरोन्नतिको क्रममा छ । सडक सहज र थप पूर्वाधारका साथै प्रचारप्रसार गरि कोप्रे झरनालाई बर्खायामको गन्तब्य बनाउन जोड दिएको नगर प्रमुख केसीले बताउनुभयो ।
