बेनी । म्याग्दीको रघुगङ्गा गाउँपालिकामा सञ्चालन भएको सामुदायिक जीविकोपार्जन प्रर्वद्धन परियोजनाबाट एक हजार चार सय घरपरिवार लाभान्वित भएका छन् ।
अन्तराष्ट्रिय रेडक्रस (आइसीआरसी)को साझेदारी र नेपाल रेडक्रस सोसाइटी केन्द्रिय कार्यालयको सहयोगमा सन २०१९ को फेबु्रअरी महिनादेखि रघुगङ्गा गाउँपालिकामा सुरु भएको परियोजनाको बिहिबार वर्हिगमन र हस्तान्तरण भएको हो ।
पहिलो चरणमा रघुगङ्गा गाउँपालिकाको वडा नं.–१ बेग, ४ दग्नाम र ७ चिमखोला तथा दोस्रो चरणमा वडा नं.–२ भगवति, ३ पिप्ले, ५ झिँ र ६ पाखापानीमा परियोजना सञ्चालन भएको थियो । दुई चरणमा सञ्चालित परियोजनाबाट एक हजार चार सय घरपरिवारलाई जिविकोपार्जन सुधारका लागि सहयोग गरिएको नेपाल रेडक्रस सोसाइटी म्याग्दी शाखाका सभापति अमर बानियाले जानकारी दिनुभयो ।
कार्यक्रम लागू भएका ठाउँका बासिन्दालाई किवी, ओखर, सुन्तला, कागति, टिम्मुर, सतुवा, बेसार, अदुवा, केरा खेती, बाख्रा, भैसी, मौरीपालन, कुखुरा, मौरीपालन, टनेलमा खेती प्रबिधी, आरन व्यवसाय व्यवस्थापन, बाँस तथा निगालोको सामग्री निर्माण, सिलाईकटाई, गोठ सुधार र घरबास सञ्चालनका लागि आर्थिक, प्राविधिक सहयोगका साथै सिपमुलक तालिम प्रदान गरिएको थियो ।
नेपाल रेडक्रस सोसाइटीका गण्डकी प्रदेश अध्यक्ष सुर्यप्रसाद ढकाल, रघुगङ्गा गाउँपालिकाका अध्यक्ष भवबहादुर भण्डारी, रेडक्रस सोसाइटीका सामुदायिक विकास विभागका निर्देशक पुजा कोइराला, कृषि ज्ञान केन्द्र म्याग्दीका प्रमुख सञ्जिव बास्तोला, डिभिजन वन कार्यालयका प्रमुख बिष्णुप्रसाद अधिकारी, रघुगङ्गा गाउँपालिकाका प्रमुख प्रशासकीय अधिकृत कुलराज पौडेल, भेटेरीनरी अस्पताल तथा पशु सेवा विज्ञ केन्द्रका प्रतिनिधी भोलानाथ आचार्य लगायतको उपस्थितिमा परियोजना हस्तान्तरण तथा बर्हिगमन कार्यक्रम सम्पन्न भएको थियो ।
