बेनी, । म्याग्दीका एक जना पुर्वजनमुक्ती सेनाको उपचारका लागि नेकपा (माओवादी केन्द्र)ले आर्थिक सहयोग गरेको छ ।
रघुगङ्गा गाउँपालिका–१ बेगका खुमबहादुर बिकको उपचारका लागि माओवादी केन्द्रको म्याग्दी–काठमाडौ सम्पर्क मञ्चको अगुवाईमा रु. दुई लाख २१ हजार नौ सय जुटाएर सहयोग गरिएको हो ।
उक्त रकम नेकपा माओवादी केन्द्रका अध्यक्ष पुष्पकमल दाहाल (प्रचण्ड)ले काठमाडौ स्थित निर्वाण मानसिक स्वास्थ्य केन्द्रमा पुगेर बिकलाई हस्तान्तरण गर्नुभएको माओवादी केन्द्रका नेता अर्जुन थापाले जानकारी दिनुभयो । उहाँका अनुसार माओवादी पार्टीको पहलमा खुमबहादुरले उपचारका लागि रु. चार लाख छुट पाउनुभएको छ ।
माओवादीको नेतृत्वमा सञ्चालन भएको दश वर्षे जनयुद्धमा जनमुक्ती सेना रहेका खुमबहादुरले करिब चार वर्ष केन्द्रमा उपचार गर्नुभएको हो । उहाँ घर फर्कने तयारीमा हुनुहन्छ । मानसिक समस्या देखिएका बिकको उपचारमा आर्थिक अभाव भएपछि माओवादीका नेता कार्यकर्ता तथा पुर्व जनमुक्ति सेनाहरुले सहयोग जुटाएका हुन् ।
